- MS યુનિવર્સિટી ફરી વિવાદમાં આવી
- 27 વિદ્યાર્થીઓને અપાઈ ઉઘરાણીની નોકરી
- વિદ્યાર્થીઓ હવે ઉઘરાણી કરશે?
વડોદરાની MS યુનિવર્સિટી કોમર્સના પ્લેસમેન્ટને લઈ વિવાદમાં આવી છે. મહારાજા સયાજીરાવ યુનિવર્સિટીના પ્લેસમેન્ટમાં કોમર્સના 27 વિદ્યાર્થીઓને ખાનગી કંપનીએ કલેક્શન એક્ઝિટ્યુટિવના નામે રિકવરીની નોકરી આપતા વિવાદ સર્જાયો છે. યુનિવર્સિટીના 27 જેટલા વિદ્યાર્થીઓને ઉઘરાણીની નોકરી અપાઈ છે. જેના કારણે ભારે વિવાદ સર્જાયો છે.
યુનિવર્સિટીમાં ચાલી રહ્યા છે કેમ્પસ પ્લેસમેન્ટ
મળતી માહિતી અનુસાર, એમ.એસ યુનિવર્સિટીના કોમર્સ ફેકલ્ટીમાં કેમ્પસ પ્લેસમેન્ટ ચાલી રહ્યાં છે. કેમ્પસ પ્લેસમેન્ટ અંતર્ગત 2 દિવસ અગાઉ યુનિવર્સિટીમાં ખાનગી કંપનીઓ દ્વારા ભરતી પ્રક્રિયા હાથ ધરવામાં આવી હતી. જેમાં ફાયનાન્સ કંપનીઓ દ્વારા ઇન્ટરવ્યું યોજવામાં આવ્યા હતા.
27 વિદ્યાર્થીઓને અપાઈ રિકવરીની જોબ
આ પ્લેસમેન્ટમાં ખાનગી ફાઇનાન્સ કંપનીએ કોમર્સના 27 વિદ્યાર્થીને કલેક્શન એક્ઝિક્યુટિવના નામ હેઠળ રિકવરી(ઉઘરાણી)ની નોકરી આપી છે. એટલે કે 27 વિદ્યાર્થીઓની કલેક્શન એક્ઝિક્યુટિવની નોકરી માટે પસંદગી કરાઈ હતી. આ ઉપરાંત યુનિવર્સિટીના કેમ્પસમાં કઈ કંપની પ્લેસમેન્ટ માટે આવી તેનું મોનિટરિંગ થયું ન હતું. યુનિવર્સિટીએ મોનિટરિંગ ન કરતા ફાયનાન્સ કંપનીએ નોકરી આપી દીધી. ખાનગી કંપનીએ કલેક્શન એક્ઝિક્યુટિવના નામે રિકવરીની નોકરી આપી છે. નોકરી ઓફર કરનારી ફાયનાન્સ કંપની વિદ્યાર્થીઓ પાસે રિકવરીનું કામ કરાવશે. જે બાદ યુનિવર્સિટીના વહીવટી તંત્રની ભારે ટીકા થઈ રહી છે. કારણ કે આવી નોકરી માટે કેમ્પસ બહાર કંપની દ્વારા પસંદગી કરાતી હોય છે, પણ ફાયનાન્સ કંપની દ્વારા ફેકલ્ટીમાં આવીને રિકવરીની નોકરી અપાઈ હતી.
આવી પોસ્ટ માટે કોઈ કંપની ન આવે તેનું ધ્યાન રાખીશુંઃ ડીન
આ અંગે કોમર્સ ફેકલ્ટીના ડીન કેતન ઉપાધ્યાયએ જણાવ્યું કે, જો ફાયનાન્સ કંપનીએ આવી પોસ્ટ માટે વિદ્યાર્થીઓની પસંદગી કરી છે, તો અમે વાત કરીશું. સાથે જ આગામી સમયમાં આવી પોસ્ટ માટે કોઈ કંપની ઈન્ટરવ્યુ માટે ન આવે તે બાબતનું પણ ધ્યાન રાખવામાં આવશે.
