બેદરકારી / વડોદરા મનપાનું 'ગટર' રાજ: ચાલીને જતો યુવાન ખુલ્લી ગટરમાં ખાબક્યો, CCTV દ્રશ્યોમાં કેદ થઈ ઘટના

• વડોદરા પાલિકાની ઘોર બેદરકારીથી લોકો પરેશાન
• છેલ્લા ઘણા દિવસથી ઢાંકણા વગરની ડ્રેનેજ લાઈનની સમસ્યા
• રાહદારીઓએ જહેમત ઉઠાવી યુવકને ડ્રેનેજમાંથી બહાર કાઢ્યો

 વડોદરા મહાનગરપાલિકાની બેદરકારી ઉડીને આંખે વડગે તેવો કિસ્સો સામે આવ્યો છે. જેમાં એક યુવકનો જીવ જતા-જતા બચી ગયો.શહેરના વૃંદાવન ચાર રસ્તા તરફથી વાઘોડિયા ચોકડી જવાના રસ્તે બે યુવકો ચાલીને જઈ રહ્યા હતા. જે દરમિયાન અચાનક એક યુવાન ખુલ્લી ગટરમાં પડી ગયો હતો. જોકે યુવક જેવો જ ગટરમાં પડ્યો કે, આસપાસથી લોકો દોડીને પહોંચી ગયા. અને તે યુવકને બહાર કાઢી લીધો. આ ઘટનાના સીસીટીવી પણ સામે આવ્યા છે. વીડિયો વાયરલ થતાં જ વિપક્ષે મનપાની ઢીલી કામગીરી સામે સવાલો ઉઠાવ્યા છે. 

વડોદરા મનપાની કામગીરી સામે અનેક સવાલો
પરંતુ આ બેદરકારીને લઈને ચોક્કસથી વડોદરા મનપાના સત્તાધીશોની કામગીરી સામે સવાલ ઉઠે છે. કારણ કે, વિકાસના નામે કરોડો રૂપિયા પાણની જેમ વહાવ્યા બાદ અને કરોડો રૂપિયાનો ટેક્સ ઉઘરાવ્યા બાદ કેવી રીતે ગટરોના ઢાંકણા ખુલ્લા રહી જાય છે.? રસ્તા પર ગટર ખુલ્લી હોય તો તેને ઢાંકવાની કોની જવાબદારી છે.? જો યુવકનો જીવ ગયો હોત તો જવાબદાર કોણ હોત? સવાલો અનેક છે. ત્યારે જોવાનું એ રહેશે કે, આ ઘટના બાદ ક્યારે ઊંઘતું તંત્ર જાગે છે.