- સાપુતારામાં પ્રવાસીઓનો ધસારો
- માર્ગો ખૂલતા પ્રવાસીઓ ઉમટ્યા
- કુદરતના સાંનિધ્યમાં આવ્યાનો અનેરો અહેસાસ
ગુજરાતમાં વરસાદી માહોલ જામતા નાના મોટા ધોધ સક્રિય થતા અદભૂત નજારો જોવા મળી રહ્યો છે. પરંતુ વરસાદ પણ એવો ધોધમાર વરસ્યો કે ઠેર ઠેર વૃક્ષો ધરાશાયી તથા ભૂ સ્ખલનની ઘટના જોવા મળી હતી. તો બીજી તરફ નદીઓમાં જળસ્તર વધતા રોડ રસ્તા પર પાણી ફરી વળ્યા હતા. પરિણામે આવો રમણીય નજારો જોવા પ્રવાસીઓએ પ્લાન મૂલતવી રાખવાની ફરજ પડી હતી. તેમાનું એક સ્થળ એટલે સાપુતારા. પરંતુ હવે અહીં પ્રવાસીઓ ઉમટી પડ્યા છે.
સાપુતારામાં બ્લોક રસ્તા ખૂલી ગયા, ઉમટ્યા પ્રવાસીઓ
જી , હા ભારે વરસાદી માહોલને કારણે હિલ સ્ટેશન સાપુતારામાં જવાનો રસ્તો બ્લોક થયો હતો. પરંતુ હવે તંત્રએ આ રસ્તા પરથી ધરાશાયી થયેલા વૃક્ષો અને ભૂસ્ખલનનો કાટમાળ હટાવી લીધો છે. જેથી મોટી સંખ્યામાં પ્રવાસીઓ સાપુતારાના પ્રવાસે આવ્યા છે. ડાંગ એક માત્ર એવુ હિલસ્ટેશન છે જ્યાં ચોમાસામાં જાણે સ્વર્ગમાં આવ્યા હોઇએ તેવો અહેસાસ થયા. કુદરતના ખોળે આવ્યા હોઇએ તેવી લાગણી જન્મે. ત્યારે પ્રવાસીઓ પણ દૂર દૂરથી આ અદભૂત નજારાને માણવા આવી રહ્યા છે.
મુંબઇથી વૉટર ફોલ જોવા આવ્યા- પ્રવાસીઓ
પ્રવાસીઓએ જણાવ્યું કે તેઓ મુંબઇથી ડાંગ ખાસ આ કુદરતી નજારો જોવા આવ્યા છે. વોટરફોલ અને કુદરતી સૌંદર્યને માણવા માટે અહીં આવ્યા છીએ. અમે એક મહિનાથી પ્લાન કરી રહ્યા હતા ડાંગમાં આવવાનો. પરંતુ વરસાદને કારણે શક્ય ન બન્યુ. હજી ગઇ કાલથી જ રસ્તો ખૂલ્યો હોવાથી આજે આ નજારો જોઇ શક્યા. મહત્વનું છે કે છ-સાત દિવસ પહેલા સાપુતારા નજીક સુરતની ખાનગી બસ ખીણમાં પડી હતી. આ બસમાં 50થી વધુ મહિલાઓ સવાર હતી. તો આ બસ દુર્ઘટનામાં 2 મહિલાઓના મોત થયા હોવાનું સામે આવ્યું હતું.
પ્રકૃતિને માણવા માટેનું બેસ્ટ પ્લેસ
ગુજરાતના એવા ઘણા સ્થળો છે જ્યાં તમને કુદરતી નજારો નજીકથી માણવાનો લ્હાવો મળે. એવા સ્થળોમાનું એક એવુ ડાંગ. ડાંગ ભલે આર્થિક રીતે પછાત રહ્યુ પરંતુ કુદરતે ડાંગને પ્રકૃતિનો અખૂટ ખજાનો આપ્યો છે. ત્યારે ચોમાસુ શરૂ થતા ડાંગની રોનક જ કંઇક જુદી જોવા મળે છે. ડાંગમાં એવા ઘણા સ્થળો છે જ્યાં નિરાંતે બેસીને અલૌકીક શાંતિ અને કુદરતના સાંનિધ્યનો અનુભવ કરી શકાય. ગીરા ધોધ ડાંગ જિલ્લાની ઓળખ છે. ડાંગમાં વરસાદી મોસમ શરૂ થતા જ કુદરતી સૌદર્ય ખીલી ઉઠ્યું છે. વઘઇના આંબાપાડા ખાતે આવેલો ગીરા ધોધ જીવતં થતા નયનરમ્ય નજારો જોવા મળી રહ્યો . તો આ તરફ સાપુતારામાં પણ ચોમેર લીલોતરીના દર્શન થતા પ્રવાસીઓ ખુશખુશાલ જણાયા હતા.
