ભારત અને ઈંગ્લેન્ડ વચ્ચે ધર્મશાલામાં ટેસ્ટ શ્રેણીની પાંચમી અને છેલ્લી મેચ રમાઈ રહી છે. આ મેચમાં ભારતના ટોપ ઓર્ડર બેટ્સમેનોએ ઈંગ્લિશ બોલરોની ધોલાઇ કરી હતી. ઈંગ્લેન્ડને 218 રનમાં આઉટ કર્યા બાદ ટીમ ઈન્ડિયાના ટોપ 5 બેટ્સમેનોએ પ્રથમ દાવમાં 50+ રન બનાવ્યા હતા. આ સાથે એક અદભૂત રેકોર્ડ પણ બન્યો, જે ભારતના ટેસ્ટ ઈતિહાસમાં માત્ર ચોથી વખત બન્યો છે.
હકીકતમાં, ભારતીય ટેસ્ટ ઈતિહાસમાં આવું માત્ર ચોથી વખત બન્યું છે, જ્યારે ભારતના ટોપ-5 બેટ્સમેનોએ એક ઈનિંગમાં 50+ રન બનાવ્યા હોય. ધર્મશાલા ટેસ્ટ મેચના પહેલા દિવસે ઓપનર બેટ્સમેન યશસ્વી જયસ્વાલે શાનદાર બેટિંગ કરી હતી અને 57 રનની ઇનિંગ રમી હતી. આ પછી રોહિત શર્મા અને શુભમન ગિલે બીજા દિવસના પહેલા સેશનમાં પોતાની સદી પૂરી કરી હતી. રોહિત 103 રન બનાવીને આઉટ થયો હતો અને શુભમન 110 રન બનાવીને આઉટ થયો હતો. ચોથા અને પાંચમા નંબરે બેટિંગ કરવા આવેલા સરફરાઝ ખાન અને દેવદત્ત પડિકલે પણ અડધી સદી ફટકારી હતી. સરફરાઝ 56 રન બનાવીને આઉટ થયો હતો. જ્યારે, પદિકલે તેની ડેબ્યૂ મેચ રમીને 65 રન બનાવ્યા હતા.
સરફરાજે શાનદાર 56 રન બનાવ્યા હતા
દેવદતે પણ પોતાની શાનદાર બેટિંગથી દર્શકોના દિલ જીતી લીધા હતા તેણે 65 રન ફટકાર્યા હતા
પ્રથમ વખત 1998માં આવું બન્યું હતું
આવું પ્રથમ વખત 1998માં ભારત અને ઓસ્ટ્રેલિયા વચ્ચે કોલકાતા ટેસ્ટ મેચમાં થયું હતું . આ મેચની પ્રથમ ઇનિંગમાં ભારતના 5 નહીં પરંતુ 6 બેટ્સમેનોએ 50+ રન બનાવ્યા હતા. ઓપનર વીવીએસ લક્ષ્મણ અને નવજોત સિદ્ધુએ 95 અને 97 રન બનાવ્યા હતા. આ પછી રાહુલ દ્રવિડ (86 રન), સચિન તેંડુલકર (79 રન), મોહમ્મદ અઝહરુદ્દીન (અણનમ 163 રન) અને સૌરવ ગાંગુલી (65 રન) એ પણ શાનદાર બેટિંગ કરી અને 50+ સ્કોર બનાવ્યો.
1999માં બીજીવાર આ બન્યું હતું
મોહાલી (1999)માં રમાયેલી ભારત-ન્યૂઝીલેન્ડ ટેસ્ટ મેચમાં પણ ભારતના ટોપ-5 બેટ્સમેનોએ એક ઇનિંગમાં 50+ રન બનાવ્યા હતા. આ મેચની ભારતની બીજી ઇનિંગમાં આવું બન્યું હતું. સચિન તેંડુલકર (અણનમ 126 રન) અને રાહુલ દ્રવિડ (144 રન)એ સદી ફટકારી હતી. જ્યારે ઓપનર દેવાંગ ગાંધી (75 રન), સદાગોપ્પન રમેશ (73 રન) અને સૌરવ ગાંગુલી (64 રન) એ 50+ રન બનાવ્યા હતા.
2009માં ત્રીજીવાર ટોપ 5 બેટ્સમેનના 50+
2009માં શ્રીલંકા સામેની મુંબઈ ટેસ્ટ મેચની પ્રથમ ઈનિંગમાં ભારતના ટોપ-5 બેટ્સમેનોએ 50+ રન બનાવ્યા હતા. મુરલી વિજય (87 રન), વીરેન્દ્ર સેહવાગ (293 રન), રાહુલ દ્રવિડ (74 રન), સચિન તેંડુલકર (53 રન) અને વીવીએસ લક્ષ્મણે (62 રન) 50+ રન બનાવ્યા હતા.
ઈંગ્લેન્ડને 218 રનમાં આઉટ કર્યા બાદ ભારતે ધર્મશાળામાં પોતાની પકડ મજબૂત કરી લીધી છે. રોહિત શર્મા અને શુભમન ગીલની શાનદાર સદી ઉપરાંત ટોપ ઓર્ડરે શાનદાર બેટિંગ કરી અને ભારતની લીડને 200+ રન સુધી પહોંચાડી. જો ઈંગ્લેન્ડ આ મેચમાં પુનરાગમન કરવા ઈચ્છે છે તો તેણે બીજી ઈનિંગમાં મોટો સ્કોર બનાવવો પડશે. જો કે હાલની સ્થિતિને જોતા ભારતની જીતની શક્યતાઓ વધારે છે.
