- UPI પેમેન્ટને લઈ ફરી એકવાર મોટા સમાચાર
- UPI પેમેન્ટ પર ગ્રાહકો પાસેથી કોઈ ચાર્જ લેવામાં નહીં આવે: NPCI
- UPI દ્વારા પેમેન્ટ પર જૂની સિસ્ટમ જેવી છે તેવી જ રહેશે: NPCI
UPI પેમેન્ટને લઈ ફરી એકવાર મોટા સમાચાર સામે આવ્યા છે. વાત જાણે એમ છે કે, નેશનલ પેમેન્ટ્સ કોર્પોરેશન ઓફ ઈન્ડિયા (NPCI) દ્વારા સ્પષ્ટ કરવામાં આવ્યું છે કે, UPI પેમેન્ટ પર ગ્રાહકો પાસેથી કોઈ ચાર્જ લેવામાં આવશે નહીં. NCPI દ્વારા જાહેર કરવામાં આવેલા નિવેદનમાં કહેવામાં આવ્યું છે કે, UPIનો ઉપયોગ સંપૂર્ણપણે મફત, ઝડપી અને સુરક્ષિત છે. UPI દ્વારા, ગ્રાહકો અને દુકાનદારો વતી દર મહિને 8 અબજથી વધુ વ્યવહારો કરવામાં આવે છે. સરકારનું આ નિવેદન મીડિયા રિપોર્ટમાં ચાલી રહેલા સમાચારને લઈને આવ્યું છે, જેમાં 2000 રૂપિયાથી વધુની ચુકવણી પર 1.1 ટકા હેડ ચાર્જ લેવાનું કહેવામાં આવ્યું છે.
સરકાર દ્વારા જાહેર કરવામાં આવેલા નિવેદનમાં કહેવામાં આવ્યું છે કે ,UPI દ્વારા પેમેન્ટ પર જૂની સિસ્ટમ જેવી છે તેવી જ રહેશે. જૂની પેમેન્ટ સિસ્ટમમાં કોઈ ફેરફાર કરવામાં આવી રહ્યો નથી. 2000 રૂપિયા સુધીની ચુકવણી પર હજુ પણ કોઈ ચાર્જ નથી. બેંક ખાતામાંથી અન્ય કોઈ બેંક ખાતામાં કરવામાં આવેલી ચુકવણી પર કોઈ ચાર્જ ચૂકવવાનો નથી. નિવેદનમાં કહેવામાં આવ્યું છે કે, વેપારીએ પ્રીપેડ વોલેટ દ્વારા કરવામાં આવેલ UPI પેમેન્ટ પર ચાર્જ ચૂકવવો પડશે. તે ગ્રાહકને કોઈપણ રીતે અસર કરશે નહીં, કારણ કે તે વ્યવહારના 1% કરતા ઓછો છે.
શશું હતો સમગ્ર મામલો ?
વાત જાણે એમ છે કે, બુધવારે સવારે કેટલાક મીડિયા અહેવાલોએ દાવો કર્યો હતો કે Google Pay, Paytm અથવા Phone Pay દ્વારા રૂ. 2,000 થી વધુના વ્યવહારો પર સરચાર્જ લાગશે. મીડિયા રિપોર્ટમાં એવો પણ દાવો કરવામાં આવ્યો હતો કે, 1 એપ્રિલથી આ 1.1 ટકા ચાર્જ વેપારી ગ્રાહકો પાસેથી લેવામાં આવશે. એવો પણ દાવો કરવામાં આવ્યો હતો કે, 30 સપ્ટેમ્બર 2023 પહેલા તેની સમીક્ષા કરવામાં આવશે. તમને જણાવી દઈએ કે એક રિપોર્ટમાં સામે આવ્યું છે કે 70 ટકા UPI ટ્રાન્ઝેક્શન 2,000 રૂપિયાથી વધુના છે.
