ક્રાઇમ / મહેસાણાના મહિલા MPની ઓફિસમાં તસ્કરોએ મચાવ્યો તરખાટ, કરી એવી ચીજવસ્તુઓની ચોરી કે તમને માનવામાં નહીં આવે

• જિલ્લા પંચાયત સામે આવેલા સાંસદ સુવિધા કેન્દ્રમાં ચોરી
• સાંસદની ખુરશી, પસ્તી, તમામ નળ તસ્કરો ઉઠાવી ગયા
• પોલીસ કાફલો સાંસદની ઓફિસે પહોંચ્યો

મહેસાણા જિલ્લામાં તસ્કરોએ તરખાટ મચાવ્યો છે. જિલ્લામાં સતત ચોરીના બનાવો બની રહ્યા છે અને તસ્કરો ચોરીને અંજામ આપીને ફરાર થઈ જતા લોકો હાલ ભયના ઓઠા હેઠળ જીવી રહ્યા છે. નાઇટ પેટ્રોલિંગના ફાંકા મારતી પોલીસનું નાક વાઢી તસ્કરો મહેસાણાના જિલ્લા પંચાયત સામે આવેલ સાંસદ શારદાબેનની ઓફિસમાં હાથફેરો કરી જતા સમગ્ર વિસ્તારમાં ચકચાર મચી જવા પામી છે. આ બનાવને પગલે હાલ પોલીસનો કાફલો સાંસદની ઓફિસ ખાતે પહોંચ્યો છે.

ખુરશી, ફ્રીજ સહિતની વસ્તુઓની ચોરી
મળતી માહિતી અનુસાર, મહેસાણાના સાંસદ શારદાબેન પટેલની ઓફિસમાં ચોરી થઈ હોવાનું સામે આવ્યું છે. મહેસાણા જિલ્લા પંચાયતની સામે આવેલા સાંસદ સુવિધા કેન્દ્રમાં ચોરી થઈ છે. તસ્કરો 25 પ્લાસ્ટિક ખુરશી, ફ્રીજ, બે એસીના ઈન્ડોર, પસ્તી સહિત તમામ નળ ઉઠાવીને પલાયન થઈ જતાં હડકંપ મચી ગયો છે. 

પોલીસે હાથ ધરી તપાસ
એવું કહેવામાં આવી રહ્યું છે કે, મહેસાણાના સાંસદ શારદાબેનની ઓફિસમાં આ સતત બીજી વખત ચોરીનો બનાવ બન્યો છે. અગાઉ થયેલી ચોરીમાં સાંસદે ફરિયાદ આપવાનું ટાળ્યું હતું. આ અંગેની જાણ પોલીસને કરતા પોલીસનો કાફલો સાંસદની ઓફિસ ખાતે પહોંચ્યો છે. હાલ પોલીસ દ્વારા સમગ્ર મામલે તપાસ હાથ ધરવામાં આવી છે.

ઉમતા ગામે ચોરોએ બે મકાનને બનાવ્યા હતા નિશાન  
આપને જણાવી દઈએ કે, બે દિવસ પહેલા વિસનગર તાલુકાના ઉમતા ગામે ચોરોએ બે મકાનને નિશાન બનાવ્યા હતા. જેમાં ઉમતા ગામે બે મકાનમાંથી ચોરો સોના ચાંદીના દાગીના સહિત કુલ રૂ. 4 લાખથી વધુની ચોરી કરી ફરાર થઈ ગયા હતા. ચોરીનો બનાવ બનતા વિસનગર તાલુકા પોલીસ મથકમાં ફરિયાદ નોંધાવવામાં આવી હતી. 

ગાડીની ચોરી કરી રફુચક્કર થઈ ગયો હતો તસ્કર
થોડા દિવસ અગાઉ રાધનપુર રોડ પર આવેલ ન્યૂ સન્ની મોટર્સ ગેરેજના શટરનું તાળું તોડી ગેરેજમાંથી ચાવી લઈ ગાડીની ચોરી કરી ચોર રફુચક્કર થઈ જતાં ચકચાર મચી ગઈ હતી. જે બાદ ગેરેજ માલિકની ફરિયાદના આધારે એલસીબીએ તપાસ હાથ ધરી હતી. મહેસાણા એલસીબી ટીમે બાતમી આધારે ગણતરીની કલાકમાં જ નુગર પાસેથી ચોરીની ગાડી સાથે તસ્કરને દબોચી લીધો હતો.