- કેન્દ્ર સરકારે દેશમાં ફૂટબોલ વર્લ્ડ કપના આયોજનને મંજૂરી આપી
- ગોવા, મહારાષ્ટ્ર અને ઓડિશામાં યોજાશે અંડર-17 વિમેન્સ ફૂટબોલ વર્લ્ડ કપ
- 11 થી 30 ઓક્ટોબરની વચ્ચે રમાશે મહિલા ફૂટબોલ વર્લ્ડ કપ
- સરકારે ફૂટબોલ વર્લ્ડ કપ આયોજન માટે 2300 કરોડનું ફંડ ફાળવ્યું
ફૂટબોલ રસિયાઓ માટે સારા સમાચાર છે. ભારતમાં મોટો આંતરરાષ્ટ્રીય મહિલા ફૂટબોલ વર્લ્ડ કપ યોજાવાનો છે. કેન્દ્ર સરકારે મહિલા ફૂટબોલ આયોજનની મંજૂરી આપી દીધી છે. બુધવારે કેન્દ્રીય કેબિનેટની મળેલી બેઠકમાં દેશમાં અંડર-17 વિમેન્સ ફૂટબોલ વર્લ્ડ કપના આયોજનને મંજૂરી આપવામાં આવી હતી. ગોવા, મહારાષ્ટ્ર અને ઓડિશામાં આ વર્લ્ડ કપ યોજાશે. કેબિનેટની બેઠક બાદ પત્રકારોને માહિતી આપતા કેન્દ્રીય રમતગમત મંત્રી અનુરાગ ઠાકુરે કહ્યું કે સરકારે વિમેન્સ ફૂટબોલ વર્લ્ડ કપના આયોજન માટે સાઈનિંગ ઓફ ગેરન્ટી મંજૂર કરી છે. તેમણે કહ્યું કે 11 થી 30 ઓક્ટોબરની વચ્ચે આ ટૂર્નોમેન્ટ રમાશે.
અંડર-17 ફિફા (FIFA) વર્લ્ડ કપની 4 મોટી વાત
(1) કેન્દ્રીય રમતગમત મંત્રી અનુરાગ ઠાકુરે કહ્યું કે પીએમ મોદીએ ફિફા વર્લ્ડ કપના આયોજન માટે 2300 કરોડનું બજેટ આપ્યું છે.આ ટૂર્નામેન્ટ 11 થી 30 ઓક્ટોબર દરમિયાન દેશના ત્રણ શહેરોમાં રમાશે. નવી મુંબઈ, ગોવા અને ભુવનેશ્વર આ મેચોની યજમાની કરશે.
(2) અનુરાગ ઠાકુરે કહ્યું, ફૂટબોલમાં રસ ધરાવતી મહિલા ખેલાડીઓને આનાથી પ્રોત્સાહન મળશે. તેમજ દેશભરમાં ફૂટબોલની રમતને વધુ લોકપ્રિયતા મળશે.
(3) આ ટૂર્નામેન્ટમાં યજમાન ભારતને ફૂટબોલ 'પાવરહાઉસ' બ્રાઝિલ, મોરક્કો અને યુએસએની સાથે મુશ્કેલ ગ્રુપ એમાં સ્થાન આપવામાં આવ્યું છે. ગ્રુપ બીમાં જર્મની, નાઈજીરિયા, ચિલી અને ન્યૂઝીલેન્ડનો સમાવેશ થાય છે. જ્યારે ડિફેન્ડિંગ ચેમ્પિયન સ્પેનને ગ્રુપ સીમાં કોલંબિયા, ચીન અને મેક્સિકોની સાથે સ્થાન આપવામાં આવ્યું છે. ગ્રુપ ડીમાં જાપાન, તાન્ઝાનિયા, કેનેડા અને ફ્રાન્સનો સમાવેશ થાય છે.
(4) ભારતીય ટીમ 11 ઓક્ટોબરથી ભુવનેશ્વરના કલિંગા સ્ટેડિયમમાં અમેરિકા સામે પોતાના અભિયાનની શરૂઆત કરશે. બીજી મેચ ત્યાં 14 ઓક્ટોબરના રોજ મોરક્કો સામે રમાશે.
ફિફા વર્લ્ડ કપની ભારતને બીજી વાર યજમાની મળી
ભારતને ફિફા વર્લ્ડ કપની યજમાની મળી હોય તેવી આ બીજી ઘટના છે. ભારતે અગાઉ 2017માં મેન્સ અંડર-17 વર્લ્ડ કપની યજમાની કરી હતી.
