પ્રામાણિકતા / 2 વર્ષ સુધી સોશિયલ મીડિયા પર શોધખોળ ચલાવી, અંતે મૂળ માલિકને હોટલના માલિક મહેંદીભાઇએ 8 લાખના દાગીનાનું પાકીટ કર્યું સુપરત

• હોટલના માલિક મહેંદીભાઈની પ્રામાણિકતા
• દાગીના ભરેલું પાકિટ મૂળ માલિકને પરત કર્યું
• સો.મીડિયા પર શરૂ કરી હતી શોધખોળ
• 2 વર્ષે પાકિટના માલિક સુધી પહોંચવામાં મળી સફળતા

અમદાવાદ-લીંબડી હાઈવે પર બગોદરા ખાતે આવેલી અંબર હોટલના માલિકની પ્રામાણિકતાના ચારેબાજુ વખાણ થઈ રહ્યા છે. તેમને મળી આવેલું 8 લાખના દાગીના ભરેલું પાકિટ મૂળ માલિકને સહી સલામત પહોંચાડીને ઈમાનદારીની મિશાલ પૂરી પાડી છે. તેમણે સોશિયલ મીડિયાની મદદથી બે વર્ષે મૂળમાલિકને શોધીને તેમને કિંમતી દાગીના ભરેલું પાકિટ પરત કરીને એક દાખલો બેસાડ્યો છે કે આજે પણ દુનિયામાં સારા લોકો છે. જે લોકોની મદદ માટે તૈયાર છે. 

સુરેન્દ્રનગર જઈ રહ્યા હતા અંકિતાબેન
આ અંગે વિગતવાર વાત કરીએ આણંદ ખાતે રહેતા અંકિતાબેન ધર્મેન્દ્રભાઈ પિત્રોડા આજથી બે વર્ષ પહેલા સુરેન્દ્રનગર ખાતે લગ્નમાં જઈ રહ્યા હતા. આ દરમિયાન તેઓ અમદાવાદ બગોદરા હાઈવે પર આવેલી અંબર હોટલ ખાતે ચા-નાસ્તો કરવા ઉભા રહ્યા હતા. જ્યાં તેમના નાના દીકરાથી રોકડ રકમ, સોનાના દાગીના ભરેલું પાકિટ રમતાં-રમતાં પડી ગયું હતું. 

હોટલના માલિકને મળ્યું હતું દાગીના ભરેલું પાકિટ
જેની અંકિતાબેનને જાણ પણ નહોંતી. હોટલ પર ચા-નાસ્તો કર્યા બાદ તેઓ સુરેન્દ્રનગર જતા રહ્યા હતા. જે બાદ આ પાકિટ અંબર હોટલના માલિક મહેંદીભાઈને મળી આવ્યું હતું. તેમણે જોયું તો પાકિટમાં અંદાજે 7-8 લાખ રૂપિયાના સોનાના દાગીના હતા અને એક અંકિતા લખેલો કાગળ હતો. 

 
સોશિયલ મીડિયા પર ચલાવી શોધ
જે બાદ તેમણે હોટલમાં હાજર ગ્રાહકોની પૂછપરછ કરી પરંતુ તેમને પાકિટના માલિક મળ્યા નહીં. જે બાદ તેમણે આ પાકિટ ઘરે સાચવીને મુકી દીધું અને તેમણે કાગળમાં લખેલા અંકિતા નામના આધારે માલિકને શોધવાનું શરૂ કર્યું. આ માટે તેમણે સોશિયલ મીડિયાનો પણ સહારો લીધો. આખરે 2 વર્ષ બાદ તેઓને પાકિટના મૂળ માલિક સુધી પહોંચવામાં સફળતા મળી. 

બે વર્ષે મળ્યા પાકિટના માલિક
તેઓએ ઈન્સ્ટાગ્રામ દ્વારા અંકિતાબેન નામની મહિલા સાથે સંપર્ક કર્યો અને અંકિતાબેન પિત્રોડાને તેમનું પાકિટ સહી સલામત પહોંચાડીને ઈમાનદારીની મિશાલ પૂરી પાડી.