- જામનગરની સગી બહેનોએ ક્રિકેટમાં જમાવ્યો અગંદ પગ
- જામનગરની સુજાન અને રાબીયા સામાનું ઝળહળી રહ્યું છે નામ
- અનેક પડકારોને પાછળ પછાડી આજે પોતાની એક નવી ઓળખ ઉભી કરી
- બંન્ને દીકરીઓને ક્રિકેટ ક્ષેત્રે આગળ ધપાવવા પિતાનો પૂરતો સહયોગ
જામનગરની દીકરીઓએ અનેક પડકારોને પાછળ પછાડી આજે પોતાની એક નવી ઓળખ ઉભી કરી છે. છેલ્લા ઘણા સમયથી મહિલા ક્રિકેટ ટીમમાં જામનગરની સુજાન અને રાબીયા સામાનું નામ ઝળહળી રહ્યું છે. બંને દીકરીઓને મળેલી સફળતાને લઈને પિતા પણ ગર્વની લાગણી અનુભવી રહ્યાં છે.
.JPG)
જામનગરની દીકરીઓએ દેશમાં ઓળખ બનાવી
ક્રિકેટ ક્ષેત્રે જામનગરનો ઇતિહાસ વર્ષોથી ઉજળો રહ્યો છે અને નવી પેઢીએ પણ તેના સાહસ અને ખંતથી આ ઉજળા ઇતિહાસને સવાયો કર્યો છે. ક્રિકેટ ક્ષેત્રે જામનગરની દીકરીઓએ પણ કાઠું કાઢી દેશમાં ઓળખ બનાવી એક નવી ઉમળકાભેર સિદ્ધિ હાંસલ કરી છે. સુજાન અને રાબીયા સામાન્ય પરિવારમાંથી આવતી હોવાથી અનેક સામજિક વંટોળો વચ્ચે અને પડકારોને પાછળ પછાડી આજે પોતાની એક નવી ઓળખ ઉભી કરી છે.
.JPG)
બંને દીકરીઓએ રાત-દિવસ એક કરીને સફળતાની સિદ્ધિ મેળવી
આ દીકરીઓને અભિનંદન અને તેમના પિતાને વંદન છે, કારણ કે તેઓ લારી પર વેજ પુલાવ વેચીને પરિવારનું ગુજરાન ચલાવે છે છતાં પોતાની બંન્ને દીકરીઓને ક્રિકેટ ક્ષેત્રે આગળ ધપાવવા પૂરતો સહયોગ આપે છે. સુજાન અને રાબિયાના પિતા આસિફ સમા જામનગરમાં ત્રણ દરવાજા, ગ્રીન માર્કેટ પાસે વેજ પુલાવ વેચીને પોતાના પરિવારનું ગુજરાન ચલાવે છે. તેમને 5 દીકરીઓ છે. જેમાંથી સુજાન સમા રણજીત ટ્રોફી અને રાબિયા સમા અન્ડર 19 અને અન્ડર 15ની કેપ્ટન છે. બંને દીકરીઓએ રાત-દિવસ એક કરીને સફળતાની સિદ્ધિ મેળવી છે.
દંગલ ફિલ્મ જેવી જ સ્ટોરી જામનગરમાં જોવા મળી
સુજાન અને રાબિયાના પિતા આસિફ સમાએ જણાવ્યું હતું કે, મારે 5 દીકરીઓ છે, મારો પહેલેથી શોખ ક્રિકેટર બનવાનો હતો. પરંતુ આ શોખ માત્ર સપનું બનીને જ રહી ગયો હતો અને મેં મારા દીકરાને ક્રિકેટર બનાવવાનું મનોમન વિચારી લીધું હતું. આ દરમિયાન વસવસો ઠાલવતા કહ્યું કે ભગવાને દીકરાની પણ ખોટ રાખી છે આથી મે મારી બંને દીકરીઓને ક્રિકેટમાં કરિયર બનાવવાનું નક્કી કર્યું હતું. બંન્ને દીકરીઓ જામનગર ક્રિકેટ બંગલા ખાતે પ્રેક્ટિસ કરી હતી. કોચ મહેન્દ્ર સિંહ ચૌહાણ (તેઓ રવિન્દ્ર જાડેજાના પણ કોચ હતા) અને મારી બંને દીકરીઓને રાતદિવસની મહેનતથી સફળતા મેળવી છે.
