- છોટા ઉદેપુર જિલ્લા ભાજપ પ્રમુખનું રાજીનામુ લેવાયુ
- રશ્મિકાંત વસાવા દારૂ પીધેલી હાલતમાં જોવા મળ્યા હતા
- મંત્રી નિમિષા સુથાર સાથે રેલી અને કાર્યક્રમમાં જોડાયા હતા
છોટા ઉદેપુર જિલ્લા ભાજપ પ્રમુખ રશ્મિકાંત વસાવાનું રાજીનામું લઈ લેવામાં આવ્યું છે. રશ્મિકાંત વસાવા ગઇકાલે દારૂ પીધેલી હાલતમાં જાહેર રેલીમાં જોવા મળ્યા બાદ તાબડતોબ ઉચ્ચકક્ષાએથી એક્શન લેવામાં આવ્યા છે. ગઇકાલે છોટા ઉદેપુર જિલ્લામાં મંત્રી નિમિષા સુથાર સાથે રેલી અને કાર્યક્રમનું આયોજન કરવામાં આવ્યું હતું. જે દરમિયાન મંત્રી નિમિષા સુથારની હાજરીમાં રશ્મિકાંત વસાવા દારૂ પીધેલી હાલતમાં જોવા મળ્યા હતા. આ અંગેનો વીડિયો પણ સોશિયલ મીડિયામાં ધૂમ વાયરલ થયો હતો. જેંને લઈને અનેક સવાલો ઉઠતાં જિલ્લા ભાજપ સંગઠનના મોવડી મંડળ દ્વારા રાજીનામું લઈ લેવામાં આવ્યુ છે.
શુ હતો સમગ્ર મામલો ?
ભારતના રાષ્ટ્રપતિ તરીકેના યશસ્વી પદે પ્રથમ વખત આદિવાસી મહિલા દ્રૌપદી મુર્મુ ચૂંટાઈ આવતા આ અવસરના ભાગરૂપે છોટાઉદેપુર જિલ્લાના ઝોઝ ગામે એક કાર્યક્રમ યોજાયો હતો. ઝોઝ ગામે આયોજિત આ કાર્યક્રમમાં છોટાઉદેપુર જિલ્લા પ્રભારી અને આરોગ્ય રાજ્યમંત્રી નિમિષાબેન સુથાર, જિલ્લા ભાજપ પ્રમુખ રશ્મિકાંત વસાવા સહિત અનેક નેતાઓ અને આગેવાનોએ હાજરી આપી હતી. આ દરમિયાન છોટાઉદેપુર જિલ્લા ભાજપ પ્રમુખ રશ્મિકાંત વસાવા દારૂના નશામાં જોવા મળ્યા હતા. જેમાં રશ્મિકાંત વસાવા નશાની હાલતમાં લથડિયું ખાતા દેખાયા હતા. ઉપરાંત અશોભનીય વર્તન પણ કર્યું હતું. તથા સ્ટેજ પર ઘસઘસાટ ઊંઘતા પણ ઝડપાયા હતા. આ અંગેનો વીડિયો પણ સોશિયલ મીડીયામાં વાયરલ થયો હતો. આ વીડિયો સમગ્ર જિલ્લામાં ચર્ચાનું કેંદ્ર રહ્યો હતો. જેને લઈને આજે છોટા ઉદેપુર જિલ્લા ભાજપ પ્રમુખનું રાજીનામું લેવામાં આવ્યું હતું.
