Biporjoy Cyclone Effect: ગુજરાતના દરિયાકાંઠાના વિસ્તારોમાં બિપોરજોય વાવાઝોડાની સૌથી વધુ અસર જોવા મળવાની છે. ત્યારે સૌરાષ્ટ્રનો દરિયો જાણે હિલોળે ચઢ્યો છે. દરિયામાં ભારે કરંટ જોવા મળી રહ્યો છે. આ સાથે જ ઊંચા ઊંચા મોજા પણ ઉછળી રહ્યા છે.
Share
ગુજરાતના દરિયામાં વાવજોડાની અસર વર્તાઈ
દરિયામાં હાઈ ટાઈડની સ્થિતિ વચ્ચે દરિયો તોફાની બન્યો
દરિયા કિનારે સુરક્ષા કર્મીઓ તૈનાત કરાયા
દરિયા પર અવર જાવર બંધ કરાઈ
બિપોરજોય વાવાઝોડું વધુ આક્રામક બન્યું છે. વાવાઝોડું નજીક આવતા દરિયો ગાંડોતૂર બન્યો છે. દરિયા કાંઠાના વિસ્તારોમાં તેજ પવન ફુંકાઈ રહ્યો છે. વાવાઝોડું નજીક આવતાં દરિયામાં તોફાની મોજા ઉછળી રહ્યા છે. ગુજરાત માટે આગામી 36 કલાક મહત્વના છે. બિપોરજોય વાવાઝોડું 8 કિલોમીટરથી ગતિથી આગળ વધી રહ્યું છે.
ગીરના દરિયામાં જોવા મળ્યો ભારે કરંટ
જેમ-જેમ વાવાઝોડું નજીક આવી રહ્યું છે તેમ તેમ તેની અસર વર્તાવા લાગી છે. ગીર સોમનાથના દરિયામાં પણ બિપોરજોય વાવાઝોડાની અસર જોવા મળી રહી છે. ગીરના દરિયામાં ભારે કરંટ જોવા મળી રહ્યો છે. દરિયામાં ભારે પવન સાથે ઊંચા મોજા ઉછળી રહ્યા છે. અત્યારે વાવાઝોડું ગીર સોમનાથથી 300 કિમી દૂર છે.
જાફરાબાદ દરિયાકાંઠે ગોઠવાયો ચુસ્ત બંદોબસ્ત
ગીર સોમનાથ ઉપરાંત અમરેલીના જાફરાબાદના દરિયામાં પણ ભારે કરંટ જોવા મળી રહ્યો છે. દરિયા પર અવરજવર બંધ કરાવવામાં આવી છે. દરિયા કિનારે વરસાદી માહોલ વચ્ચે ભારે પવન ફૂંકાઈ રહ્યો છે. દરિયા કિનારે પોલીસ સહિત સુરક્ષા કર્મીઓનો ચુસ્ત બંદોબસ્ત ગોઠવવામાં આવ્યો છે.
દ્વારકાના ગોમતી ઘાટ પાસે ઊંચા મોજા ઉછળ્યાં
બિપોરજોય વાવાઝોડાની અસર ગુજરાતમાં વર્તાવાની શરૂઆત થઈ ગઈ છે. આજે દ્વારકામાં બિપોરજોય વાવાઝોડાની અસર દેખાઈ રહી છે. ગોમતી ઘાટ પાસે ઊંચા મોજા ઉછળી રહ્યા છે. તો ભારે પવન પણ ફૂંકાઈ રહ્યો છે. લોકોને દરિયા કિનારે ન જવાની સૂચના આપવામાં આવી છે. દ્વારકામાં પોલીસનો ચુસ્ત બંદોબસ્ત ગોઠવાયો છે. અત્યાર સુધી 6 હજાર 500થી વધુ લોકોનું સ્થળાંતર કરાયું છે. આ તરફ બિપોરજોય વાવાઝોડાને લઈ દ્વારકાનું તંત્ર એલર્ટ બન્યું છે. જેને લઈ દ્વારકામાં આર્મીની ટીમ સ્ટેન્ડબાય રખાઈ છે.
માંડવીમાં ભારે પવન સાથે વરસાદ શરૂ
કચ્છ જિલ્લામાં બિપરજોય વાવાઝોડાની અસર જોવા મળી રહી છે. કચ્છના માંડવીમાં ભારે પવન ફૂંકાવાનું શરૂ થયું છે. માંડવીમાં વહેલી સવારથી ભારે પવન સાથે વરસાદ શરૂ થયો છે. 15 જૂને જખૌ બંદરથી વાવાઝોડું પસાર થશે તેવું હવામાન વિભાગ દ્વારા જણાવવામાં આવી રહ્યું છે. વાવાઝોડું દરિયા કિનારે ટકરાશે ત્યારે 135 કિમીની ઝડપે પવન ફૂંકાશે. હાલ આ વાવાઝોડું ઉત્તર દિશામાં આગળ વધી રહ્યું છે. અત્યારે વાવાઝોડું જખૌથી 290 કિમી દૂર અને નલિયાથી 310 કિમી દૂર છે.
