- સુરત એક જ દિવસમાં 125 આગની ઘટના
- પોરબંદર શહેરમાં 30 આગના બનાવો
- રાજકોટમાં દિવાળીના દિવસે આગના 124 બનાવો
સનાતન ધર્મનો સૌથી મોટો તહેવાર દિવાળી પર્વ ચાલી રહ્યું છે. આ મહા પર્વ પર અનેક સ્થળોએ આગના બનાવો બન્યા છે. સુરતમાં એક જ દિવસમાં 125 આગના બનાવો બન્યા છે તો બીજી તરફ પોરબંદરમાં 30 બનાવો બન્યા છે. જ્યારે રાજકોટમાં 124 આગના કોલ ફાયર વિભાગને મળ્યા છે.
29 આગના કોલ રાંદેર ઝોનમાંથી આવ્યા
સુરતમાં એક જ દિવસમાં 125 આગની ઘટના બની છે. 36 કલાકમાં આગના 125 કોલ આવ્યા હતા. જેમાં સૌથી વધુ 29 આગના કોલ રાંદેર ઝોનમાંથી આવ્યા છે જ્યારે અઠવા ઝોનથી ફાયર વિભાગને 19 કોલ મળ્યા છે. વરાછા એ અને બી ઝોનમાં ફાયરને 22 કોલ મળ્યા છે. આપને વિગતે જણાવીએ તો ઉધના A અને Bમાં આગની 13 ઘટના સામે આવી છે, જ્યારે લિંબાયતમાં 16 આગની ઘટના બની હતી. કતારગામ ઝોન વિસ્તારમાં 18 આગની ઘટના ઘટી છે.
સદનસીબે કોઈ જાનહાનિ નહીં
દિવાળીના દિવસે પોરબંદર શહેરમાં 30 આગના બનાવો ધ્યાને આવ્યા છે. 1 દિવસમાં 30 જેટલા આગના બનાવના કોલ ફાયર વિભાગને મળ્યા હતા. જેમાં ફાયર વિભાગની ઉત્કૃષ્ટ કામગીરીના કારણે કોઈ જાનહાની થઈ નથી. આગના બનાવોમાં સદનસીબે કોઈ જાનહાનિ થઈ નથી. તમામ આગની ઘટના ફટાકડાના કારણે લાગી હોવાની પ્રાથમિક માહિતી સામે આવી છે.
રાજકોટમાં 124 આગના બનાવો
રાજકોટમાં દિવાળીના દિવસે આગના 124 બનાવો નોંધાયા છે. ખુલ્લા વાડાઓમાં કચરાના ઢગલાઓમાં આગ લાગવાની 114 ઘટના સામે આવી છે. તો બીજી તરફ 3 ઓફિસમાં આગ લાગ્યાની દુર્ઘટના પણ નોંધાઇ છે. 3 ઔધોગિક એકમોમાં આગ લાગ્યા વિગતો સામે આવી છે. જો વાત કરવામાં આવે કાળી ચૌદશના દિવસેની તો શહેરમાં 14 જગ્યાએ આગના બનાવ નોંધાયા હતા. જ્યારે ધનતેરસના દિવસે રાજકોટમાં આગ લાગવાના 8 બનાવો બન્યા હતા.
