ક્રાઇમ / વધુ એક ગુજરાતીની અમેરિકામાં હત્યા, મોટેલના ભાડા મુદ્દે માથાકૂટ થતા હત્યારો ફાયરિંગ કરી ફરાર

• અમેરિકામાં વધુ એક ગુજરાતી નાગરિકની હત્યા કરી દેવાઇ
• 69 વર્ષીય જગદીશ પટેલ સાઉથ કેરોલીનમાં રહેતા હતા
• મોટેલમાં રહેવા પર ભાડા અંગેની માથાકૂટ બાદ હત્યાને અંજામ

જગદીશ પટેલ કે જેઓ અમેરિકાના સાઉથ કેરોલીનમાં રહેતા હતા અને તેઓ ત્યાં મોટેલના બિઝનેસ સાથે સંકળાયેલ હતાં. તેઓની ગોળી મારીને હત્યા કરી દેવાઇ છે.

મોટેલમાં રહેવા પર ભાડા અંગેની માથાકૂટ બાદ હત્યાને અંજામ

ગત રોજ એક શખ્સે જગદીશભાઈની ઓફીસમાં ઘૂસીને 2 રાઉન્ડ ફાયરિંગ કર્યું હતું. બે રાઉન્ડ ફાયરિંગ કરીને હત્યારો ત્યાંથી નાસી છૂટ્યો હતો. પરંતુ આ અંગે મળતી વિગતો અનુસાર હત્યારો મોટેલમાં રહેતો હતો અને ભાડાં મુદ્દે માથાકૂટ થતા હત્યારાએ હત્યા કરી હોવાનું જાણવા મળી રહ્યું છે. જો કે આવી ઘટના પહેલીવાર નથી ઘટી કે જ્યારે અમેરિકામાં કોઈ ગુજરાતીની હત્યા કરી દેવાઇ હોય. આ પહેલાં પણ અનેક ગુજરાતીઓને અમેરિકામાં ટાર્ગેટ કરવામાં આવ્યા છે.

એક ગોળી માથામાં અને બીજી પેટના ભાગે વાગતા ઇજાઓ થઇ હતી

25 જૂનના રોજ રાતના સમયે જ્યારે જગદીશ પટેલ પોતાની ઓફિસમાં બેઠા હતા. એ દરમ્યાન મોટેલમાં રોકાયેલો એક શખ્સ તેઓની ઓફિસમાં આવ્યો અને તેણે ભાડા મુદ્દે માથાકૂટ કરી. હત્યારાએ ભાડુ ન ચૂકવવા મુદ્દે જગદીશ પટેલ સાથે માથાકૂટ કરી હતી. પરંતુ માથાકૂટ વધારે વણસી જતા તે શખ્સે જગદીશ પટેલને ગોળીઓ ધરબી દીધી હતી. આથી, જગદીશ પટેલને એક ગોળી માથામાં અને બીજી પેટના ભાગે વાગતા જગદીશ પટેલને ગંભીર ઇજાઓ થઇ હતી. આથી, પરિવાર દ્વારા તેઓને તાત્કાલિક સારવાર માટે હોસ્પિટલ લઈ જવાયા પરંતુ 30 જૂનના રોજ તેઓનું મોત નિપજ્યું.

જગદીશ પટેલનું આખું ફેમિલી વર્ષ 2007થી અમેરિકામાં સ્થાયી છે

વધુમાં જણાવી દઇએ કે, જગદીશ પટેલનું આખું ફેમિલી વર્ષ 2007થી અમેરિકામાં સ્થાયી છે અને તેઓના પુત્ર અને વહુ બંને અમેરિકાના શિકાગોમાં ડૉકટર છે. જગદીશ પટેલ કે જેઓ સચિન પોપડાના વતની છે. હસમુખા સ્વભાવના જગદીશ પટેલ કાંઠા વિસ્તારમાં સારા ક્રિકેટર પણ હતા. તેઓ MTB આર્ટસ કોલેજમાં કિકેટ ટીમના કૅપ્ટન પણ રહી ચૂકયા હતા. દોઢ વર્ષ પહેલા પણ આ જ રીતે અમેરિકામાં ભરથાણાના દંપતીને મોટેલમાં રહેતા એક બદમાશે રૂમના ભાડા બાબતે માથાકૂટ કરીને ગોળી ધરબી દીધી હતી. જેમાં પત્નીનું મોત નિપજ્યું હતું.