તેજી / સુપ્રીમ કોર્ટમાંથી રાહત મળતા જ અદાણીની આવકમાં જોરદાર ઉછાળો: તૂટી ગયા કમાણીના જૂના રેકૉર્ડ

• હિંડનબર્ગ રિસર્ચ કેસમાં સુપ્રીમ કોર્ટમાંથી રાહત મળી
• ગૌતમ અદાણીની નેટવર્થમાં જોરદાર ઉછાળો આવ્યો 
• કોર્ટમાંથી રાહત મળતાં જ અદાણી ગ્રૂપના શેરમાં તેજી

અદાણી ગ્રુપના ચેરમેન ગૌતમ અદાણી માટે બુધવાર સર્વાંગી ખુશી લઈને આવ્યો હતો. હિંડનબર્ગ રિસર્ચ કેસમાં સુપ્રીમ કોર્ટમાંથી રાહત મળતાં જ અદાણી ગ્રૂપના શેર રોકેટ બની ગયા હતા. ગ્રૂપના શેરમાં લગભગ 12 ટકાનો વધારો થયો હતો અને ગ્રૂપનું માર્કેટ કેપ રૂ. 15 લાખ કરોડને પાર કરી ગયું હતું. શેરોમાં વધારાને કારણે અદાણીની નેટવર્થમાં પણ 4.01 અબજ ડોલર એટલે કે લગભગ રૂ. 3,34,06,70,85,000નો વધારો થયો અને તે 89.9 અબજ ડોલર સુધી પહોંચી ગયો. આ સાથે તે અમીરોની યાદીમાં એક સ્થાન ઉપર ચઢીને 14મા સ્થાને પહોંચી ગયા છે. આ વર્ષે તેની નેટવર્થમાં $5.64 બિલિયનનો રેકોર્ડ વધારો જોવા મળ્યો છે જ્યારે ગયા વર્ષે તે સૌથી વધુ નેટવર્થ ગુમાવનાર વ્યક્તિ હતા. પરંતુ જેમ જેમ નવું વર્ષ નજીક આવ્યું તેમ તેમ તેનું નસીબ બદલાઈ ગયું. છેલ્લા બે દિવસમાં તેમની નેટવર્થમાં સૌથી વધુ વધારો થયો છે.

કેસની તપાસ માત્ર સેબી કરશે 

અદાણી-હિંડનબર્ગ રિસર્ચ કેસમાં બુધવારે સુપ્રીમ કોર્ટે પોતાના નિર્ણયમાં કહ્યું કે આ કેસની તપાસ માત્ર સેબી કરશે અને તેને SIT કે CBIને ટ્રાન્સફર કરવામાં આવશે નહીં. જેના કારણે ગ્રુપના શેરમાં જોરદાર ઉછાળો જોવા મળ્યો હતો. અદાણી એનર્જી સોલ્યુશન્સમાં સૌથી વધુ 11.60%નો વધારો થયો હતો. અદાણી ટોટલ ગેસમાં 9.84%, અદાણી ગ્રીન એનર્જીમાં 6 %, અદાણી પાવરમાં 4.99%, અદાણી વિલ્મરમાં 3.97%, NDTVમાં 3.66%, અદાણી એન્ટરપ્રાઈઝમાં 2.45%, અદાણી પોર્ટ્સમાં 1.39%, અંબુજા સિમેન્ટ્સમાં 0.94% અને ACC 0.10 ટકાનો વધારો થયો હતો. ગયા વર્ષે હિંડનબર્ગ રિસર્ચના અહેવાલ પછી ગૃપના શેરમાં નોંધપાત્ર ઘટાડો થયો હતો.

અંબાણી પણ ઉપર આવ્યા

બુધવારે વિશ્વના ટોચના 10 અમીર લોકોમાંથી સાતની નેટવર્થમાં ઘટાડો નોંધાયો હતો. ટોચના એલોન મસ્કની નેટવર્થ $7.13 બિલિયન ઘટીને $220 બિલિયન થઈ છે. બીજા સ્થાને જેફ બેઝોસે $1.57 બિલિયન, બર્નાર્ડ આર્નોલ્ટે $5.50 બિલિયન, બિલ ગેટ્સે $1.17 બિલિયન અને લેરી એલિસને $1.97 બિલિયન ગુમાવ્યા. અનુભવી રોકાણકાર વોરેન બફેની નેટવર્થમાં $1.34 બિલિયનનો વધારો થયો છે. નેટવર્થમાં ઘટાડા છતાં એશિયાના સૌથી ધનાઢ્ય વ્યક્તિ મુકેશ અંબાણી વિશ્વના સૌથી અમીર લોકોની યાદીમાં એક સ્થાન આગળ વધીને 12મા સ્થાને પહોંચી ગયા છે. બુધવારે તેમની નેટવર્થ $96.7 મિલિયન ઘટીને $96.2 બિલિયન રહી.