હૈયાવરાળ / રવિવાર હતો તો મારો દીકરો બચી ગયો, જિંદગીમાં આટલું પાણી ક્યારેય નથી જોયું : અમદાવાદના પરિવારની વેદના

• અમદાવાદમાં પાણી ઓસર્યા બાદ ઠેર-ઠેર તારાજી
• દેવાસ એપાર્ટમેન્ટના લોકોની ઘરવખરી પલળી ગઈ 
• જનપ્રતિનિધિઓ રુદન નથી સાંભળતા

અમદાવાદમાં રવિવારે ત્રાટકેલા વરસાદને લઈને જનજીવનને માંઠી અસર થઇ છે. અનરાધાર વરસાદને લઈને અમદાવાદના મોટાભાગના વિસ્તારો પાણી...પાણી... થયા હતા. સ્થળ ત્યાં જળ જેવી હાલત ઊભી થઇ હતી. આ દરમિયાન પાણી ભરાતા અમદાવાદના વાસણાના દેવાસ એપાર્ટમેન્ટના લોકોની સ્થિતિ દયનીય બની છે. વરસાદી પાણી ઘરમાં ઘૂસી જતાં લોકોની ઘરવખરીને મોટાપાયે નુકસાન થયું છે. લોકોએ મહા મહેનતે વસાવેલી ઘરવખરી તણખલાની જેમ તણાઈ હતી અને જીવ બચાવવા સ્થાનિકોએ આખી-આખી રાત ચિંતામાં  જાગી પાસર કરી હતી. આ મામલે આપવીતી જણાવતા અસરગ્રસ્ત સોસાયટીની મહીલા VTV ન્યૂઝના કેમેરા સામે રડી પડ્યા હતા.

મારી જિંદગીમાં અમે આટલું પાણી ક્યારેય નથી જોયું : સ્થાનિક મહીલા
વાસણાના દેવાસ એપાર્ટમેન્ટના રહિશ મહિલાએ રુદન સાથે પોતાની આપવીતી જણાવી હતી તેમણે કહ્યું હતું કે મારી જિંદગીમાં અમે આટલું પાણી ક્યારેય નથી જોયું ! વધુમાં તેમણે ઉમેર્યું કે હું અને મારા પતિ કામ કરતાં હોવાથી મારા દીકરાને માતા પાસે મૂકીને જતા હોય છીએ. પરંતુ રવિવાર હોવાથી અમે બધા લોકો ઘરે હાજર હતા જેથી રવિવાર હતો એટલે મારો દીકરો બચી ગયો, નહિતર  મારા પુત્રનું શુ થાત ? વધુમાં તેમના ભણતરની ચોપડીઓ ઉપરાંત ઘરની બધી વસ્તુઓ પલડી ગઈ હોવાની પરિવારે વેદના ઠાલવી હતી.

દેવાસ એપાર્ટમેન્ટના લોકોની દયનીય સ્થિતિ
મેઘતાંડવને લઈને વાસણાના દેવાસ એપાર્ટમેન્ટમાં પાણી ઘૂસવાની શરૂઆત થતા સ્થાનિક રહેવાસીઓ મુશ્કેલીમાં મુકાયા હતા. પાણી ઘૂસતાની સાથે જ ઘરના બાળકોથી માંડી મોટેરા તમામ લોકો ઘરવખરી બચાવવા મહેનતમાં લાગ્યા હતા. પ્રથમ વસ્તુઓને ઉપર મૂકી અને પાણી ઉલેચવા સહિતના બચાવવાના પ્રયાસ કરવા છતાં પણ પાણી ઓસર્યું ન હતું અને ઘરવખરી પાણીમાં તણાઇ ગઈ હતી. અમદાવાદના વાસણામાં લોકોના ટીવી, ફ્રિજ સહીતની વસ્તુઓ જળ હોનારતમાં તણાઇ ગઈ હતી. જેથી દેવાસ એપાર્ટમેન્ટના લોકોની દયનીય સ્થિતિ સામે આવી છે. છતાં પણ જનપ્રતિનિધિઓ વિસ્તારની મુલાકાતે ન આવતા લોકોમાં રોષ જોવા મળી રહ્યો છે.