વાવાઝોડું / ઝંઝાવાતી ચક્રવાતમાં ફેરવાયેલું ‘મોકા’, 175 કિમીની ઝડપે આંધી ફૂંકાશે! આ વિસ્તારો પર જોખમ

• બમણી સ્પીડે આગળ વધતું મોકા વાવાઝોડું
• 175 કિમીની ઝડપે આંધી ફૂંકાશે કરશે અનેક વિસ્તારોને અસર
• NDRF એલર્ટ મોડ પરઃ રેસ્ક્યૂ માટે ૩૦૦ લોકોની સ્પેશિયલ ટીમ તૈનાત

દક્ષિણ-પૂર્વ બંગાળના અખાત પર ચક્રવાત ‘મોકા’ આજે સવારે ભયાનક અને ઝંઝાવાતી તોફાનમાં ફેરવાઈને ઝડપથી આગળ વધી રહ્યું છે. ભારતીય હવામાન વિભાગના જણાવ્યા પ્રમાણે આજે સવારે ચક્રવાતી તોફાન ‘મોકા’ પોર્ટ બ્લેરથી લગભગ ૫૨૦ કિલોમીટર પશ્ચિમમાં અને કોકસ બજાર (બાંગ્લાદેશ)થી ૧,૧૦૦ કિલોમીટર દક્ષિણ-પશ્ચિમમાં હતું. આ તોફાનની અસર હવે ધીમે ધીમે કેટલાંક રાજ્યોમાં વર્તાવા લાગી છે અને કેટલાંક રાજ્યોમાં આંધી-તોફાન સાથે વરસાદ પણ શરૂ થઈ ગયો છે. 

૩૦૦ જેટલા બચાવકર્મીઓની સ્પેશિયલ ટીમ એલર્ટ મોડ પર
હવામાન વિભાગના જણાવ્યા અનુસાર ચક્રવાત ‘મોકા’ વધુને વધુ તોફાની બનતું જાય છે અને તે બાંગ્લાદેશમાં કોકસ બજાર અને મ્યાનમારમાં બંદર શહેર સિત્ત્વેની નજીક કયૌકપ્યૂની વચ્ચે રવિવારે સમુદ્રતટ સાથે ટકરાશે. ત્યારે ‘મોકા’ની અસરથી કલાકના ૧૭૫ કિલોમીટરની ઝડપે આંધી પણ ફૂંકાશે. હવામાન વિભાગ અને પ્રશાસને માછીમારો, જહાજો, નૌકાઓ અને ટ્રોલરોને મધ્ય અને પૂર્વોત્તર બંગાળના અખાત અને ઉત્તરીય આંદામાન સમુદ્રમાં નહીં જવાની સલાહ આપી છે. ચક્રવાતી તોફાન સામે કામ લેવા એનડીઆરએફની આઠ ટીમો તહેનાત કરાઈ છે અને ૩૦૦ જેટલા બચાવકર્મીઓની સ્પેશિયલ ટીમ પણ એલર્ટ મોડ પર છે. 

ત્રિપુરા અને મિઝોરમમાં ભારે વરસાદની આગાહી

‘મોકા’ના કારણે ત્રિપુરા અને મિઝોરમમાં ભારે વરસાદ થવાની ચેતવણી આપવામાં આવી છે. આ ઉપરાંત નાગાલેન્ડ, મણિપુર, પશ્ચિમ બંગાળ અને દક્ષિણ આસામમાં પણ કેટલાંક સ્થળોએ વરસાદ થશે. ‘મોકા’ ચક્રવાતના રૂટને લઈ હવામાન વિભાગે પહેલાં એવી આગાહી કરી હતી કે આ ચક્રવાત ભારતના દક્ષિણ તટીય વિસ્તારો, ઓડિશા અને દક્ષિણ-પૂર્વ ગંગા કિનારે પશ્ચિમ બંગાળ થઈને પસાર થશે, જોકે હવે ચક્રવાત ‘મોકા’નો રૂટ બદલાયો છે અને તે બંગાળના અખાત પર થઈ ઉત્તર-પૂર્વોત્તર બાંગ્લાદેશ-મ્યાનમાર સમુદ્રકાંઠા તરફ વળી ગયું છે.