કાર્યક્રમ / શાકભાજીવાળા સાથે દરેક PI બેઠક કરે, 48 કલાકમાં બનાવો પ્લાન: ગૃહરાજ્યમંત્રી સંઘવીએ સુરતમાં જુઓ શા માટે આપ્યો આવો આદેશ

• રાજ્યના ગૃહરાજ્ય મંત્રી હર્ષ સંઘવીએ લોક સંવાદ કાર્યક્રમ યોજ્યો
• "દરેક પોલીસ સ્ટેશનના PI શાકભાજી વાળા સાથે બેઠકો કરે"
• "રોજગારી માટે લોકોને તકલીફ ન પ઼ડવી જોઈએ"

રાજ્યના ગૃહરાજ્ય મંત્રી હર્ષ સંઘવીએ સુરતના અલથાણ કોમ્યુનિટી હોલ ખાતે લોક સંવાદ કાર્યક્રમ યોજ્યો હતો.જેમાં લોકોની સાથે પોલીસ અધિકારીઓ પણ હાજર રહ્યાં હતાં. સુરતમાં હર્ષ સંઘવીએ લોક સંવાદ કાર્યક્રમમાં સંબોધન કરતા જણાવ્યું હતું કે, જે અગવડતાઓ પડી રહી છે તેના નિકાલ કરવા આ કાર્યક્રમનું આયોજન કરાયું છે.

'નાગરિકોને નુકસાન ન થાય તેવું કામ કરો'
મંત્રી હર્ષ સંઘવીએ જણાવ્યું કે, ફૂટપાથ ઉપર શાકભાજી, ફ્રુટ વેંચતા અનેક લોકો આવ્યા છે. ત્યારે તમારી રોજગારી ચાલુ રહે અને જપ્ત ન થાય તે માટે વ્યવસ્થામાં સહયોગ કરો તેમજ ટ્રાફિક અને ગંદકીની સમસ્યા ઉભી ન કરો. તેમણે કહ્યું કે, પોલીસ સાથે સંકલન કરો સહયોગ કરો નહીંતર સખત પગલાં લેવામાં આવશે. પરિવારના ગુજરાન માટે શહેરના અન્ય નાગરિકોને નુકસાન ન થાય તેવું કામ કરો.

'PI શાકભાજી વાળા સાથે બેઠકો કરે'
તેમણે કહ્યું કે, દરેક પોલીસ સ્ટેશનના PI શાકભાજી વાળા સાથે બેઠકો કરે અને રોજગારી માટે લોકોને તકલીફ ન પડવી જોઈએ તે રીતે આગામી 48 કલાકમાં પ્લાન બનાવો. હર્ષ સંઘવીએ કહ્યું કે, નો ડ્રગ્સ ઇન સુરત સીટીને સફળ બનાવવા પોલીસને સહયોગ આપો. પોલીસની સાથે મને પણ માહિતી આપો જેથી પોલીસ શું કરે છે તેની ખબર પડે. તેમણે ઉમેર્યું કે, સુરત પોલીસની કામગીરી ખૂબ સરાહનીય કામગીરી છે. સુરત પોલીસે એક વર્ષમાં 976 મોબાઈલ લોકોને 'તેરા તુઝકો અર્પણ' હેઠળ પરત કર્યા છે.