અમદાવાદ / VIDEO: 'સાહેબ મારી ગાડી બદલાઈ ગઈ છે..!' સલામત સવારીનું રિયાલિટી ચેક કરતાં સામે આવ્યા રમૂજી દ્રશ્યો, સુવિધાના ઠેકાણાં નહીં

• અનેક એસટી બસની હાલત ખખડધજ
• વિટીવી ન્યૂઝના રિયાલીટી ચેકમા સામે આવ્યા દ્રશ્યો

એસટી વિભાગની જાહેર પરિવહનની બસો સલામતીની દ્રષ્ટીએ પણ ખતરા રૂપ છે. કોઈ બસના ડોરને ડોરીથી બાંધીને રાખવો પડ્યો છે તો કોઈ બસમાં બારીના કાચ નથી. કોઈ બસમાં સામાન મૂકવાની ડેકીના ઠેકાણા નથી તો કોઈ બસની ડ્રાઇવરની સીટ પર કવર જ નથી. આ દ્રશ્યો પરથી એવું સાબિત થાય છે કે, રાજ્યમાં જાહેર રોડ પર એવી અનેક બસો ચાલી રહી છે જેના નિર્ધારિત કિલોમીટર વર્ષો પહેલા પૂરા થઈ ગયા છે.  છતાં પણ આવી બસો જર્જરિત હાલતમાં રોડ પર દોડી રહી છે. માત્ર બસની કંડીશનની જ વાત ક્યાં કરવી. સલામત ગણાતી એસટીના ડ્રાઇવરો પણ સિટબેલ્ટના નિયમોની એસીતૈસી કરીને બસ હંકારી રહ્યા છે. વીટીવીએ જ્યારે સિટબેલ્ટ વિશે બસના ડ્રાઈવરોની જાગૃતિ વિશે રિયાલિટી ચેક કર્યું તો હાસ્યજનક દ્રશ્યો સર્જાયા હતા.

એસટી નિગમ નવી બસોની  રાહ જોઈ રહ્યું છે

રાજ્યની મોટા ભાગની એસટી બસોમાં સીટબ્લેટ જ કાર્યરત નથી. એક બાજુ ટ્રાફિકના નિયમોની મોટી મોટી વાતો થાય છે, પણ બીજી બાજુ રાજ્યસરકારના એસટી નિગમની આ સ્થિતિ છે. સવાલ એ થાય છે કે ટ્રાફિકના કડક નિયમો શું સામાન્ય પ્રજા માટે જ છે, સરકારી વાહનોને નિયમો લાગુ પડતા નથી?  આપને જણાવી દઈએ કે, દર વર્ષે રાજ્ય સરકાર દ્વારા  એસટી નિગમને નવી બસ ફાળવવામાં આવે છે. જો કે તેમ છતાં સ્ક્રેપમાં નાખી દેવા જેવી હજુ 1200 જેટલી બસ રોડ પર દોડી રહી છે. એસટી નિગમ નવી બસોની  રાહ જોઈ રહ્યું છે. પરંતુ ત્યાં સુધી  જોખમી સવારી પ્રવાસીઓ પોતાના જોખમે કરવાની રહેશે.

5 વર્ષમાં એસટી બસની હાલત સ્ક્રેપમાં નાખી દેવા જેવી થઈ જાય

એસટી નિગમના કહેવા પ્રમાણે તો,  5 વર્ષમાં એસટી બસની હાલત સ્ક્રેપમાં નાખી દેવા જેવી થઈ જાય છે. કારણ કે 5 વર્ષમાં 8 લાખ કિલોમીટર ગાડી ફરી જાય છે. પરંતુ સરકારનો બીજો નિયમ 15 વર્ષે વાહનને જૂનું ગણવું તેવો છે. ત્યારે જોવાનું  એ રહેશે. નિયમોની આ આંટી ઘૂંટીમાં પ્રજાને સલામત બસ મળે છે કે કેમ?