- ધોનીએ બેટિંગ કરતા 17 બોલમાં 32 રનની ઇનિંગ રમી હતી
- કોચ સ્ટીફન ફ્લેમિંગ CSKના ચાહકો માટે ખરાબ સમાચાર લઈને આવ્યા
- કોચે ધોનીની ઈજા વિશે વાત કરી હતી જેના કારણે ફેન્સ ચિંતિત થયા
ગઇકાલે રમાયેલ રાજસ્થાન રોયલ્સ સામેની મેચમાં ચેન્નાઈ સુપર કિંગ્સના કેપ્ટન મહેન્દ્ર સિંહ ધોનીએ બેટિંગ કરતા 17 બોલમાં 32 રનની ઇનિંગ રમી હતી. સાથે જ તેની ઇનિંગમાં ધોની 3 છગ્ગા અને 1 ચોગ્ગા ફટકાર્યા હતા. ભલે ધોની છેલ્લા બોલે સિક્સર મારી શક્યો ન હતો પણ તેને ફેન્સનું દિલ ચોક્કસ જીતી લીધું.
નોંધનીય છે કે સીએસકેને મેચમાં 3 રનથી હારનો સામનો કરવો પડ્યો હતો અને હવે એ બાદ મેચ પછી કોચ સ્ટીફન ફ્લેમિંગ CSKના ચાહકો માટે ખરાબ સમાચાર લઈને આવ્યા. જણાવી દઈએ કે મીડિયા સાથે વાત કરતા કોચે ધોનીની ઈજા વિશે વાત કરી હતી જેના કારણે ફેન્સ ચિંતિત થઈ ગયા છે.
વાત એમ છે કે સ્ટીફન ફ્લેમિંગએ જણાવ્યું કે બંને ઘૂંટણની ઈજાથી પીડિત છે. 'ધોની ઘૂંટણની ઈજાથી પરેશાન છે અને તમે તેમને જોઈને પણ આ અનુભવી શકો છો. ધોનીની ફિટનેસ હંમેશા શાનદાર રહી છે અને તે ખૂબ જ પ્રોફેશનલ પણ છે. એવામાં હાલ અમે તેમની ઈજા પર નજર રાખી રહ્યા છીએ. તે એક શાનદાર ખેલાડી છે.' જો કે કોચે ધોનીની ઈજા વિશે વધુ જણાવ્યું નથી સાથે જ એવું પણ જણાવ્યું નથી કે તે આગામી મેચમાં રમશે કે નહીં પણ અચાનક ધોનીના ઘૂટણની ઇજા વિશે વાત કરીને હવે આ વાત ચાહકોના મનમાં ઘર કરી ગઈ છે.
જણાવી દઈએ કે CSK કેમ્પમાં ઘણા ખેલાડીઓ ઈજાગ્રસ્ત થયા છે જ્યારે તેમાંથી કેટલાક ખેલાડીઓ આઈપીએલમાંથી જ બહાર થઈ ગયા છે.
નોંધનીય છે કે ધોની ઉપરાંત દીપક ચહર, સિમરજીત, બેન સ્ટોક્સ અને સિસાંડા મગાલા પણ ઈજાગ્રસ્ત છે. આ સાથે જ જેમિસન અને મુકેશ ચૌધરી પણ ઈજાના કારણે IPL 2023માંથી બહાર થઈ ગયા છે. આ બધા ખેલાડીઓ માંથી દીપક ચહર 2 અઠવાડિયા માટે ટીમની બહાર છે તો સિસાંડા મગાલા પણ ઓછામાં ઓછા 1 અઠવાડિયા સુધી ક્રિકેટ રમી શકશે નહીં. આ સિવાય બેન સ્ટોક્સ પણ રિકવરીની રાહ જોવાઈ રહી છે.
