- ફરી એકવાર કિંગ ખાનને ધમકીઓ મળી છે
- શાહરૂખ ખાનને અપાઇ Y+ કેટેગરીની સુરક્ષા
શાહરૂખ ખાન માટે 2023 શાનદાર વર્ષ છે. આ વર્ષની શરૂઆતમાં તેની ફિલ્મ 'પઠાણ'એ બોક્સ ઓફિસ પર ધૂમ મચાવી અને હાલ તેની ફિલ્મ 'જવાન'એ કમાણીના ઘણા નવા રેકોર્ડ બનાવ્યા છે. આ દરમિયાન એક ચોંકાવનારા સમાચાર સામે આવ્યા છે. શાહરૂખ ખાનની સુરક્ષા ફરી એકવાર વધારી દેવામાં આવી છે. રિપોર્ટ અનુસાર, શાહરૂખને હાલમાં જ કેટલીક ધમકીઓ મળી હતી, જેના કારણે હવે મહારાષ્ટ્ર સરકારે તેમણે Y+ કેટેગરીની સુરક્ષા આપવાનો નિર્ણય કર્યો છે.
ફરી એકવાર કિંગ ખાનને ધમકીઓ મળી છે
વાત એમ છે કે શાહરૂખ ખાનની ફિલ્મ પઠાણ આ વર્ષે જાન્યુઆરીમાં રિલીઝ થઈ હતી. આ દરમિયાન તેને ધમકીઓ મળી હતી અને મુંબઈ પોલીસે તેને સુરક્ષા પૂરી પાડી હતી. એવા સમાચાર છે કે ફરી એકવાર કિંગ ખાનને ધમકીઓ મળી છે, પરંતુ મુંબઈ પોલીસે તેની પુષ્ટિ કરી નથી. પોલીસે આ અંગે સત્તાવાર રીતે કંઈપણ કહેવાનો ઈન્કાર કર્યો છે. જો સૂત્રોનું માનીએ તો મહારાષ્ટ્ર રાજ્ય ગુપ્તચર વિભાગે તાજેતરમાં આ વિશે માહિતી આપી હતી અને ત્યારબાદ શાહરૂખ ખાનને Y+ સુરક્ષા આપવાનો નિર્ણય કર્યો હતો.
તમને જણાવી દઈએ કે વાય પ્લસ સિક્યોરિટી હેઠળ શાહરૂખને 11 પર્સનલ સિક્યોરિટી સ્ટાફ મળશે, જેમાં 6 કમાન્ડો, 4 પોલીસકર્મી અને 1 ટ્રાફિક ક્લિયરિંગ વાહન હશે. શાહરૂખ ખાનને તેના બોડીગાર્ડ તરીકે 6 પોલીસ કમાન્ડો હંમેશા મળશે. જે મહારાષ્ટ્ર પોલીસની સુરક્ષા હેઠળ જ તૈનાત કરવામાં આવશે. તેમને સમગ્ર ભારતમાં સુરક્ષા પૂરી પાડવામાં આવશે અને તેઓ MP-5 મશીનગન, AK-47 એસોલ્ટ રાઈફલ્સ અને ગ્લોક પિસ્તોલથી સજ્જ હશે અને તેમના ઘરે ચાર પોલીસકર્મીઓ પણ સતત તૈનાત રહેશે. અગાઉ શાહરૂખ ખાનને બે પોલીસ કોન્સ્ટેબલની સુરક્ષા આપવામાં આવી હતી.
