- અમદાવાદમાં સિક્યુરીટી ગાર્ડ બેફામ
- વેપારીને મારમારતા દ્રશ્યો સીસીટીવીમાં કેદ
- સુમેલ બિઝનેસ પાર્ક 3ની ઘટના
અમદાવાદમાં હવે તો દરેક સોસાયટી અને બિલ્ડીંગમાં સિક્યુરીટી ગાર્ડ રાખવામાં આવે છે. ત્યારે એક એવો બનાવ સામે આવ્યો જેમાં સિક્યુરીટી ગાર્ડે જ કાયદો હાથમાં લઇ લીધો. સોસાયટીના રહીશોની સિક્યુરીટી કરવાને બદલે તેણે તો જાહેરમાં જ મારામારી કરી નાંખી. જે સમગ્ર ઘટના સીસીટીવી ફૂટેજમાં કેદ થઇ છે.
સુમેલ બિઝનેસ પાર્ક 3ની ઘટના
અમદાવાદમાં સિક્યુરિટી ગાર્ડની દાદાગીરી સામે આવી છે. અમદાવાદના સુમેલ બિઝનેસ પાર્કમાં સિક્યુરીટી ગાર્ડે વેપારીને જાહેરમાં માર માર્યો. હાલમાં વેપારીને સારવાર અર્થે હોસ્પિટલ ખસેડવામાં આવ્યો છે. અમદાવાદના સુમેલ બિઝનેસ પાર્ક 3ની આ ઘટના છે. ટ્રાઇડન્ટ સિક્યુરીટી ગાર્ડસની દાદાગીરીના દ્રશ્યો સીસીટીવીમાં કેદ થયા છે. એક વેપારી સાથે મારામારી કરતા શખ્સો જોવા મળી રહ્યા છે.
પોલીસની હાજરીમાં મારામારી
આ સમગ્ર ઘટના દરમિયાન પોલીસ અને એસોસિએશનના હોદ્દેદારો પણ હાજર હતા તેમ છતાં વેપારીને આ પ્રકારે જાહેરમાં માર મારવામાં આવી રહ્યો હતો. ત્યારે અહીં સવાલ એ થાય કે શું વેપારીનો કોઇ વાંક હશે ? પોલીસની હાજરી હોવા છતાં પણ સિક્યુરીટી ગાર્ડસના માણસો બેફામ કેમ બન્યા ? શું પોલીસની મંજૂરીથી વેપારીને માર મારવામાં આવ્યો ?
કાગડાપીઠ પોલીસે ગુનો કર્યો દાખલ
વેપારીને શા માટે માર મારવામાં આવ્યો , શા માટે આ ઘટના બની તેનુ કારણ જાણી શકાયુ નથી પરંતુ સિક્યુરિટી ગાર્ડ્સના આવા વર્તનને લઇને લોકોમાં રોષની લાગણી જોવા મળી રહી છે. મારામારી કરતા સિક્યુરિટી ગાર્ડના જવાનો સામે કાર્યવાહીની માગ ઉઠી છે. સમગ્ર મામલે કાગડાપીઠ પોલીસે આરોપી ગાર્ડસ સામે ગુનો દાખલ કરીને વધુ તપાસ હાથ ધરી છે.
