ભાઈજાનને કોનાથી ખતરો? / સલમાન ખાનને અપાઈ Y+ કેટેગરીની સુરક્ષા, અનુપમ ખેર-ફડણવીસની પત્નીની સિક્યુરિટીમાં પણ વધારો

• મહારાષ્ટ્ર સરકારે સલમાન ખાનની સુરક્ષા વધારીને Y+ કેટેગરી વાળી કરી
• અક્ષય કુમારને પણ મળશે X કેટેગરીની સુરક્ષા 
• શિંદેના 41 ધારાસભ્યોને પણ Y પ્લસ કેટેગરીની સુરક્ષા મળશે 

પંજાબી ગાયક સિદ્ધુ મુસેવાલાની હત્યા પછી બૉલીવુડમાં ઘણો ડરનો માહોલ જોવા મળી રહ્યો છે. મુસેવાલા હત્યાના આરોપી લોરેન્સ બિશ્નાઈ ગેંગ તરફથી ઘણા બૉલીવુડના સિતારાઓને જાનથી મારી નાખવાની ધમકીઓ મળી છે અને આ પગલે મહારાષ્ટ્ર સરકારે ભાઈ જાન 'સલમાન ખાન'ની સુરક્ષા વધારીને Y+ કેટેગરી વાળી કરી છે. સાથે જ ખતરાને ધ્યાનમાં રાખીને અભિનેતા અનુપમ ખેર, ઉદ્યોગપતિ અજય પીરામલ અને આનંદ પીરામલ, ડેપ્યુટી સીએમ દેવેન્દ્ર ફડણવીસની પત્ની અમૃતા ફડણવીસની સુરક્ષાને પણ Y+ કેટેગરીમાં અપગ્રેડ કરવામાં આવી છે. Y+ કેટેગરી નો અર્થ એ છે કે આ લોકોની સાથે બે સશસ્ત્ર વાળા કોન્સ્ટેબલો 24 કલાક તૈનાત રહેશે.

અક્ષય કુમારને X કેટેગરીની સુરક્ષા 
રાજ્યના ખુફિયા વિભાગ દ્વારા ત્યાંના પ્રતિષ્ઠિત વ્યક્તિઓના જીવને જોખમના મૂલ્યાંકન પછી તૈયાર કરવામાં આવેલ રિપોર્ટ પર થી આ અલગ અલગ કેટેગરીની સુરક્ષા આપવામાં આવી રહી છે. અભિનેતા અક્ષય કુમારને X કેટેગરીની સુરક્ષા આપવામાં આવી છે એટલે કે જ્યારે પણ તે ઘરની બહાર જશે ત્યારે તેની સુરક્ષામાં એક સશસ્ત્ર કોન્સ્ટેબલ તૈનાત રહેશે. 

શિંદેના 41 ધારાસભ્યોને પણ Y પ્લસ કેટેગરીની સુરક્ષા મળશે 
એક અધિકારીએ સોમવારે જણાવ્યું હતું મહારાષ્ટ્ર સરકારના સીએમ એકનાથ શિંદેના તમામ 41 ધારાસભ્યો અને 10 સાંસદોને નવી સરકારની રચનાના ત્રણ મહિના પછી  Y+ સુરક્ષા ચાલુ રાખવાનો નિર્ણય લીધો છે. ગુપ્તચર વિભાગ પાસેથી મળેલી માહિતીના આધારે આ નિર્ણય લેવામાં આવ્યો છે. 

મહા વિકાસ અઘાડીના નેતાઓની ઘટી સુરક્ષા 
મહારાષ્ટ્ર સરકારે હાલમાં જ ઉદ્ધવ ઠાકરેના નેતૃત્વવાળીશિવસેના, એનસીપી અને કોંગ્રેસના મહા વિકાસ અઘાડી ગઠબંધનના 25 નેતાઓનું સુરક્ષા કવચ હટાવી દીધું છે. જો કે પૂર્વ મુખ્યમંત્રી ઉદ્ધવ ઠાકરે અને તેમના પરિવારની સુરક્ષા યથાવત રાખવામાં આવી છે. રાષ્ટ્રવાદી કોંગ્રેસ પાર્ટીના નેતા શરદ પવાર અને તેમની પુત્રી અને બારામતી લોકસભા સાંસદ સુપ્રિયા સુલે સહિત તેમના પરિવાર માટે સુરક્ષા પણ એમ જ રાખવામાં આવી છે.