- કેન્દ્રીય સામાજિક ન્યાય અને અધિકારીતા રાજ્યમંત્રીનું મોટું નિવેદન
- રામદાસ આઠવલે કહ્યું, તેઓ મહારાષ્ટ્રના આગામી મુખ્યપ્રધાન બનવા ઇચ્છુક
- આઠવલેએ NCPના વડા શરદ પવારને પણ NDAમાં જોડાવાની ઓફર કરી
કેન્દ્રીય સામાજિક ન્યાય અને અધિકારીતા રાજ્યમંત્રી રામદાસ આઠવલેનું મોટું નિવેદન સામે આવ્યું છે. વાત જાણે એમ છે કે, તેમણે કહ્યું કે, તે મુખ્યમંત્રી બનવા માંગે છે. રામદાસ આઠવલે કહ્યું તેઓ મહારાષ્ટ્રના આગામી મુખ્યપ્રધાન બનવા ઇચ્છુક છે. આઠવલેએ NCPના વડા શરદ પવારને પણ નેશનલ ડેમોક્રેટિક એલાયન્સ (NDA)માં જોડાવાની ઓફર કરી હતી.
રામદાસ આઠવલેએ મહારાષ્ટ્રના સાંગલીમાં એક પ્રેસ કોન્ફરન્સમાં કહ્યું કે, આજકાલ દરેક વ્યક્તિ મુખ્યમંત્રી બનવાની રેસમાં છે. જોકે જો કોઈની પાસે બહુમતી હોય તો જ આ શક્ય છે. તેમણે વધુમાં કહ્યું કે, કારણ કે આ અંગે ઘણી ચર્ચા થઈ રહી છે. હું કહેવા માંગુ છું કે, હું પણ મુખ્યમંત્રી બનવાની ઈચ્છા રાખું છું.
હું મુખ્યમંત્રી બનવા તૈયાર છુ
કેન્દ્રીય સામાજિક ન્યાય અને અધિકારીતા રાજ્યમંત્રી રામદાસ આઠવલેએ એક પ્રેસ કોન્ફરન્સમાં કહ્યું કે, જો આવી કોઈ ચર્ચા ચાલશે તો હું ચોક્કસ મુખ્યમંત્રી બનવા તૈયાર છું. પરંતુ હાલમાં અમારી સરકાર સ્થિર છે અને એકનાથ શિંદે સારી રીતે કામ કરી રહ્યા છે. તે દિવસમાં 16 થી 18 કલાક કામ કરે છે. તેઓ એક કાર્યક્ષમ મુખ્યમંત્રી છે.
શરદ પવારે અમને રાજકારણ શીખવ્યું: રામદાસ આઠવલે
આઠવલેએ કહ્યું, શરદ પવારે અમને રાજકારણ શીખવ્યું. તેમના જેવા અનુભવી લોકોએ NDAમાં આવવું જોઈએ. જ્યોર્જ ફર્નાન્ડિસ અને નીતિશ કુમાર જેવા વિવિધ વિચારધારાના લોકો પણ NDAમાં આવ્યા હતા. તેથી પવાર સાહેબે આ પ્રસ્તાવ પર વિચાર કરવો જોઈએ. નોંધનીય છે કે, પવારના ભત્રીજા અને NCP નેતા અજિત પવારે ગયા અઠવાડિયે કહ્યું હતું કે, તેઓ પણ મહારાષ્ટ્રના મુખ્યપ્રધાન બનવાની ઈચ્છા ધરાવે છે.
