સહકારી જગતમાં બે ફાટા / 'ઓટ જોઈ કિનારે ઘર ન બનાવે': જયેશ રાદડિયાના સમર્થનમાં ભૂપત બોદારે મુકેલુ સ્ટેટસ ચર્ચામાં

• રાજકોટમાં સહકારી જગતમાં ભાજપના જ 2 જૂથો વચ્ચે ગરમાવો
• પૂર્વ કેબિનેટ મંત્રી જયેશ રાદડીયાના સહકારી નેતૃત્વને લઈ 2 ભાગ
• આજે જિલ્લા પંચાયતના પ્રમુખ ભૂપત બોદરનું સ્ટેટસ ચર્ચામાં

રાજકોટમાં સહકારી જગતમાં ભાજપના બે જૂથ પડ્યા છે. જેમાં જિલ્લા બેંકના ચેરમેન જયેશ રાદડિયા છે તો બીજા પક્ષમાં યાર્ડના વર્તમાન ડિરેક્ટર પરસોત્તમ સાવલિયા, નીતિનભાઈ ઢાંકેચા, યાર્ડના પૂર્વ વાઇસ ચેરમેન હરદેવસિંહ જાડેજા અને રાજકોટ લોધિકા સંઘના વર્તામન ડિરેક્ટર વિજયભાઈ સખિયાનો સમાવેશ થાય છે. કેટલીક ફરિયાદના નિરાકરણ માટે ભાજપના સહકારી જગતના નેતાઓએ પ્રદેશ પ્રમુખ સી.આર. પાટીલને સાથે મુલાકાત કરીને રજૂઆત કરી હતી. જિલ્લા સહકારી બેન્કમાં ભરતીમાં અને સહકારી જગતમાં લેવાતા નિર્ણય સામે પોતાની નારાજગી વ્યક્ત કરી છે. હવે નિર્ણય લેવા માટે 10 દિવસ સુધીની રાહ જોશે. ત્યારબાદ ફરી રણનીતિ ઘડશે.

રાદડિયાનું સહકારી ક્ષેત્રે ખુબ જ વર્ચસ્વ છે. ત્યારે હવે આજે જિલ્લા પંચાયતના પ્રમુખ ભૂપત બોદરનું સ્ટેટસ ચર્ચામાં આવ્યું છે. જયેશ રાદડિયાની તરફેણ કરતું સ્ટેટસ રાખતા રાજકારણ ગરમાયું છે. ભૂપત બોદરે જયેશ રાદડીયાના ફોટા સાથે શાયરી પોસ્ટ કરી હતી. જેમાં તેમણે લખ્યું કે, કહો વિરોધીઓને દરિયાની જેમ હું પાછો જરૂર આવું છું. એ મારી ઓટ જોઇને કિનારે ઘર બનાવે છે.