- કોંગ્રેસ નેતા રાહુલ ગાંધીએ નિવાસસ્થાન ખાલી કરવાનું શરૂ કર્યું
- ટ્રક ભરીને ઘરવખરી ઘરની બહાર કાઢવામાં આવી
- માતા સોનિયા ગાંધીના 10 જનપથ સ્થિત નિવાસસ્થાને શિફ્ટ થશે
બદનક્ષી કેસમાં કોંગ્રેસ નેતા રાહુલ ગાંધીને 23 માર્ચે સુરત કોર્ટે દોષિત ઠેરવ્યા છે. આ મામલે કોર્ટે બે વર્ષની સજા ફટકારી હતી. બાદમાં રાહુલ ગાંધીનું સંસદનું સભ્યપદ પણ રદ કરી દેવામાં આવ્યું છે. જેનું સભ્યપદ રદ કરાયા બાદ ગૃહ સમિતિએ 27 માર્ચે રાહુલ ગાંધીને નોટિસ આપી એક મહિનાની અંદર ઘર ખાલી કરવા તાકીદ કરી હતી. જેના ભાગરૂપે કોંગ્રેસ નેતા રાહુલ ગાંધીએ આજે (14 માર્ચે) પોતાનું નિવાસસ્થાન ખાલી કરવાનું શરૂ કર્યું છે. આજે શુક્રવારે એક ટ્રક ભરીને ઘરવખરી ઘરની બહાર કાઢવામાં આવી હતી.
10 જનપથ સ્થિત નિવાસસ્થાને શિફ્ટ થવા જઈ રહ્યા છે
મહત્વનુ છે કે રાહુલ ગાંધી દિલ્હીમાં 12 તુગલક લેન સ્થિત આવેલા બંગલામાં રહેતા હતા.હવે આ બંગલો ખાલી કર્યા બાદ તેઓ પોતાના માતા સોનિયા ગાંધીના 10 જનપથ સ્થિત નિવાસસ્થાને શિફ્ટ થવા જઈ રહ્યા છે. 27 માર્ચે આપેલ કમિટીની નોટિસ અંગે તેમણે લોકસભા સચિવને પત્ર લખ્યો હતો. જેમાં કહ્યું કે તેઓ છેલ્લા ચાર વખતથી લોકસભાના ચૂંટાયેલા સભ્ય હોવાને નાતે અહીં સારો એવો સમય પસાર થયો હતો. મારી પાસે આ વિશે ઘણી સારી યાદો છે. જેથી કોંગ્રેસ નેતાએ કોર્ટના નિર્ણયને પડકાર્યો છે.
મારી લડત ચાલુ જ રહેશે : રાહુલ ગાંધી
નોંધનીય છે કે રાહુલ ગાંધી બુધવારે કેરળના વાયનાડમાં એક જનસભાને સંબોધી હતી. આ વેળાએ તેઓએ કહ્યું હતું કે 50 વખત મારું ઘર જપ્ત કરો, છતાં પણ હું લોકોના પ્રશ્નો ઉઠાવતો રહીશ. તમે ગમે તેટલી ધમકાવવાની ડરાવવાની કોશિશ કરો છતાં પણ મારી લડત ચાલુ જ રહેશે. અમે કોઈપણ ધમકીઓથી ડરતા નથી.
