હવામાન / આ વર્ષ ચોમાસું સામાન્ય રહેવાની શક્યતા, 96% વરસાદ થવાનું અનુમાન

દેશમાં આ વર્ષે સારા ચોમાસાની હવામાન વિભાગે આગાહી કરી છે. ત્યારે પરંપરાગત હવામાનના જાણકાર અંબાલાલ પટેલે પણ કહ્યું કે, રાજ્યના કેટલાક વિસ્તારોમાં 24 કલાકમાં વંટોળની શક્યતા છે. 21 એપ્રિલથી ફરી ગરમી શરૂ થશે અને 26 એપ્રિલ બાદ ગરમીનું જોર વધી જશે.. તો સાથે જ અંબાલાલ પટેલે કહ્યું કે, આ વખતે જૂનની શરૂઆતથી ચોમાસુ બેસશે અને આ વખતે ચોમાસુ સારુ રહેશે. સુરત, અમરેલી, બનાસકાંઠા, સાબરકાંઠામાં સારો વરસાદ રહેશે. જ્યારે અમદાવાદ અને વડોદરામાં પણ સારા વરસાદની આગાહી અંબાલાલ પટેલે કરી છે.

પૃથ્વી વિજ્ઞાન મંત્રાલયના સેક્રેટરી ડો.એમ.રાજીવન અને ભારતીય હવામાન વિભાગના જનરલ સેક્રેટરી ડો.કે.જે.રમેશે જણાવ્યું હતું કે આ વર્ષે ચોમાસા દરમિયાન જૂનથી સપ્ટેમ્બર સુધીમાં વરસાદ લગભગ સામાન્ય રહેવાનું અનુમાન છે. 96 ટકા સરેરાશ વરસાદ થવાનું અનુમાન કરવામાં આવ્યું છે. 
 
ખરીફ પાક માટે લાભદાયક રહેશે ચોમાસું: તેમણે જણાવ્યું કે આ વર્ષે ચોમાસા દરમિયાન અલનીનોની સ્થિતિ નબળી રહેશે અને ચોમાસાના છેલ્લા બે મહિનામાં તેની તીવ્રતા ઓછી રહેવાનું અનુમાન છે. 

આ વખતે ચોમાસાના વરસાદનું વિતરણ પણ સારું રહેશે. જે આગામી ખરીફ પાક માટે લાભદાયક રહેશે. આ પહેલા પ્રાઈવેટ એજન્સી સ્કાઈમેટે 2019માં દેશમાં મોનસૂન સામાન્યથી ઓછું રહેવાનું અનુમાન કર્યું હતું. સ્કાઈમેટના જણાવ્યા પ્રમાણે આ વર્ષે ચોમાસામાં એલપીએની સરખામણીમાં 93 ટકા વરસાદ થઈ શકે છે. તેમાં 5 ટકાનો વધારો કે ઘટડો પણ થઈ શકે છે. 
 
જૂન-સપ્ટેમ્બરની વચ્ચે ચોમાસામાં એલપીએ સરેરાશ 887 મિલીમીટરની સરખામણીમાં ઓછો વરસાદ થશે. ચોમાસું સામાન્ય કરતા નબળું રહેવાની 55% શકયતા છે. ફેબ્રુઆરીમાં સ્કાઈમેટે મોનસૂન સામાન્ય રહેવાનું અનુમાન કર્યું હતું: અગાઉ સ્કાઈમેટ 25 ફેબ્રુઆરી 2019એ રિપોર્ટ બહાર પાડીને આ વર્ષે ચોમાસું સામાન્ય રહેવાનું અનુમાન કર્યું હતું. આ કારણે ચોમાસું સામાન્ય રહેવાનું અનુમાન કરવામાં આવ્યું હતું. જોકે હાલની સ્થિતિમાં ખૂબ જ પરિવર્તન જોવા મળી રહ્યું છે.