- સંસદનું ચોમાસું સત્ર 20 જુલાઈથી શરુ થઈને 11 ઓગસ્ટ સુધી ચાલશે
- પહેલા જુના ભવનમાં થશે બેઠક, પછી નવા ભવનમાં
- દિલ્હી સર્વિસ સંબંધિત બિલ રજૂ કરી શકે સરકાર
સંસદના ચોમાસું સત્રની તારીખ આવી ગઈ છે. કેન્દ્રીય સંસદીય બાબતોના મંત્રી પ્રહલાદ જોશીએ ટ્વિટ કરીને આ તારીખની માહિતી આપી હતી. તેમના કહેવા પ્રમાણે, 20 જુલાઈથી સંસદનું ચોમાસું સત્ર શરુ થશે જે 11 ઓગસ્ટ સુધી ચાલશે. મંત્રીએ કહ્યું કે તમામ રાજકીય પક્ષોને સહકાર આપીને ડિબેટમાં ભાગ લેવાનો આગ્રહ કર્યો હતો. પ્રહલાદ જોશીએ કહ્યું કે સંસદનું ચોમાસું સત્ર 23 દિવસ સુધી ચાલશે અને તેમાં 17 બેઠકો હશે.
નવા સંસદમાં થશે ચોમાસું સત્ર
વડાપ્રધાન નરેન્દ્ર મોદી દ્વારા 28 મેના રોજ ઉદ્ઘાટન કરવામાં આવેલ આ નવા સંસદ ભવન આગામી ચોમાસુ સત્રની યજમાની માટે તૈયાર છે. સંસદમાં હાજર લગભગ તમામ રાજકીય પક્ષો માટે ઓફિસોની ઓળખ કરવામાં આવી છે. મુખ્ય વિભાગોને નવા સંસદ ભવનમાં સ્થળાંતર કરવા કહેવામાં આવ્યું છે.
દિલ્હી સરકારની સત્તાનું પાંખ કાપતું બીલ રજૂ કરાશે
આગામી સત્રમાં, સરકાર 'ગવર્નમેન્ટ ઑફ ધ નેશનલ કેપિટલ ટેરિટરી ઑફ દિલ્હી (સુધારા) વટહુકમ' ને બદલવા માટે એક બિલ લાવે તેવી શક્યતા છે, જે સેવાની બાબતો પર દિલ્હી સરકારને કાયદાકીય અને વહીવટી નિયંત્રણ આપતા સુપ્રીમ કોર્ટના નિર્ણયને રદ કરશે. સરકાર આ બિલને જલ્દીથી પસાર કરાવવાનો પ્રયાસ કરશે. નેશનલ રિસર્ચ ફાઉન્ડેશન (NRF) બિલ પણ સંસદમાં રજૂ કરવામાં આવે તેવી શક્યતા છે. કેન્દ્રીય કેબિનેટે ગયા મહિને NRFની સ્થાપનાના પ્રસ્તાવને મંજૂરી આપી હતી.
UCC બીલ લવાય તેવી પણ સંભાવના
સંસદના ચોમાસું સત્રમાં સરકાર યુનિફોર્મ સિવિલ કોડને લઈને બિલ લાવે તેવી પણ સંભાવના છે કારણ કે બે દિવસ પહેલા પીએમ મોદીએ આ અંગે જાહેરમા મોટું નિવેદન આપીને તેની તરફદારી કરી ચૂક્યા છે.
મણિપુર હિંસા પર વિપક્ષ સરકારને ઘેરશે
આ સત્ર તોફાની રહેવાની ધારણા છે કારણ કે સંસદની બેઠક એવા સમયે થઈ રહી છે જ્યારે વડા પ્રધાન નરેન્દ્ર મોદીએ સમાન નાગરિક સંહિતા માટે મજબૂત હિમાયત કરી છે. ચોમાસુ સત્રમાં વિપક્ષ પાસે અનેક મુદ્દા છે જેના પર તે સરકારને ઘેરવાની યોજના ધરાવે છે. દિલ્હી અધ્યાદેશ સિવાય વિપક્ષ મણિપુરમાં ચાલી રહેલી હિંસાના મુદ્દે પણ હંગામો મચાવી શકે છે. શિયાળુ સત્રમાં પણ વિપક્ષ અને શાસક પક્ષ વચ્ચેના ઘર્ષણના કારણે કામકાજ થઈ શક્યું ન હતું.
