સુવિધા / પાસપોર્ટ માટે હવે લાઈનમાં નહીં ઊભા રહેવું પડે, પાસપોર્ટ ઓફિસનો નવતર પ્રયોગ

• પાસપોર્ટ માટે હવે લાઈનમાં નહીં ઊભું રહેવું પડે
• રિઝનલ પાસપોર્ટ ઓફિસનો નવતર પ્રયોગ
• એક કેમ્પ અને ત્વરિત નિકાલ

સામાન્ય રીતે લોકોના મનમાં સરકારી કચેરી એટલે ધક્કા ખવાઓનું માધ્યમ એવી જ માનસિકતા બંધાઈ ચૂકી છે. એમાં પણ પાસપોર્ટની વાત આવે એટલે તો કેટલાક લોકોનું મગજ જ બેર મારી જતું હોય છે. કેમ કે, પાસપોર્ટ ઓફિસો બહાર લાંબી લાઈનો જ લાગતી હોય છે. પાસપોર્ટ માટે દસ્તાવેજી પુરાવાઓ ખૂબ જ જરૂરી હોવાથી અનેક વખત અરજદારોને ધકકાઓ ખાવા પડતા હોય છે. પરંતુ આજે અમદાવાદમાં આવેલી રીઝનલ પાસપોર્ટ ઓફિસ દ્વારા નવતર પ્રયોગ હાથ ધરાયો છે. જેથી લોકોને હવે લાઈનમાં ઊભું રહેવું પડશે નહિ.

અરજદારોના પાસપોર્ટની ક્ષતિઓ ઉકેલવા કેમ્પનું આયોજન
ભવિષ્યમાં પરદેશ જવા માગતા લોકોની ઊડાન સરળ કરી આપવા તંત્ર કામે લાગ્યું છે. અમદાવાદ સ્થિત ગુલબાઈ ટેકરા પાસેની રિઝનલ પાસપોર્ટ ઓફિસના પરિસર એક જ સ્થળે એક જ સમયે અરજદારોના પાસપોર્ટની તમામ ક્ષતિઓ અને સમસ્યાઓનો ઉકેલ આવે એ માટે કેમ્પનું આયોજન કરવામાં આવ્યું હતું. આ માટે અહીં વહેલી સવારથી જ રાજ્યભરમાંથી લોકો પહોંચી ગયા હતા. લોકોએ પાસપોર્ટ ઓફિસની આ પહેલની પ્રસંશા કરી હતી હતી.

દેશ જવા ઈચ્છુક અનેક લોકોના દિલ જીતી લીધા
ગુજરાતમાં કોઈને પણ પાસપોર્ટ સંબંધિત કોઈ સમસ્યા હોઈ તો તેનો અમદાવાદના કેમ્પમાં ત્વરિત નિકાલ થાય એ પ્રકારની વ્યવસ્થા કરાઇ હતી. 1 જાન્યુઆરી 2022થી 30મી જૂન સુધીની તમામ પાસપોર્ટ અરજી સંબંધિત સમસ્યાનો નિકાલ આ કેમ્પ દ્વારા કરવામાં આવ્યા હતા. કેમ્પને લઈ ગુજરાતના છેવાડાના વિસ્તારોમાંથી લોકો અમદાવાદ ખાતેની પાસપોર્ટ ઓફિસ પહોંચ્યા હતા. ગુજરાતના સોમનાથ, આણંદ, ગોંડલ, પોરબંદર, દ્વારકા, મહેસાણાથી લોકો પાસપોર્ટ કઢાવવા માટે અમદાવાદ પહોંચ્યાં હતા. જેમાંના કેટલાક લોકોને આ કેમ્પનો સારો અનુભવ પણ રહ્યો તો કેટલાકને ફરીવાર નિરાશ થવું પડ્યું હતું. પાસપોર્ટ વિભાગની કેટલીક ક્ષતિઓને લઈને લોકોમાં પણ રોષ જોવા મળ્યો હતો. આમ, આજે અમદાવાદમાં આવેલી રીઝનલ પાસપોર્ટ ઓફિસ દ્વારા જે નવતર પ્રયોગ હાથ ધર્યો તેણે પરદેશ જવા ઈચ્છુક અનેક લોકોના દિલ જીતી લીધા હતા.