- તિહાડ જેલમાં બંધ ફરી એકવાર ગેંગવોર
- કુખ્યાત ગેંગસ્ટર ટિલ્લુ તાજપુરિયા ઉર્ફે સુનીલ માનની હત્યા
- ટિલ્લુ પર હુમલો કરનાર બદમાશનું નામ યોગેશ ટુંડા
- કોર્ટમાં ગેંગસ્ટર જિતેન્દ્ર ગોગીની હત્યામાં સામેલ હતો ટિલ્લુ
તિહાડ જેલમાં બંધ કુખ્યાત ગેંગસ્ટર ટિલ્લુ તાજપુરિયા ઉર્ફે સુનીલ માનની હત્યા કરવામાં આવી છે. વાત જાણે એમ છે કે, મંગળવારે સવારે જેલમાં બંધ બદમાશોએ લોખંડની ગ્રીલ તોડીને તેના પર હુમલો કર્યો હતો. બદમાશોએ ટિલ્લુના પેટમાં લોખંડનો સળિયો માર્યો હતો . આ હુમલામાં તે ગંભીર રીતે ઘાયલ થયો હતો. જેલના કર્મચારીઓએ તેને ઝડપથી દીન દયાલ ઉપાધ્યાય હોસ્પિટલમાં દાખલ કર્યો, જ્યાં ડોક્ટરોએ તેને મૃત જાહેર કર્યો હતો.
તિહાડ જેલમાં બંધ ટીલ્લુ તાજપુરિયાનું સવારે સાડા છ વાગ્યે દીન દયાલ ઉપાધ્યાય હોસ્પિટલમાં નિધન થયું હતું. ટિલ્લુ પર હુમલો કરનાર બદમાશનું નામ યોગેશ ટુંડા છે. આ હુમલામાં યોગેશના સાથીઓએ પણ તેને સાથ આપ્યો હતો. જોકે પોલીસે હવે સમગ્ર મામલાની તપાસ શરૂ કરી છે. નોંધનીય છે કે, ટિલ્લુ તાજપુરિયા સામે હત્યા સહિતના અનેક ગુના નોંધાયેલા છે.
ટિલ્લુને બેભાન અવસ્થામાં હોસ્પિટલમાં લવાયો
દિલ્હી પોલીસના જણાવ્યા અનુસાર આજે સવારે માહિતી મળી હતી કે, જેલમાં બે લોકો ઘાયલ થયા છે. તેને દીન દયાલ ઉપાધ્યાય હોસ્પિટલમાં દાખલ કરવામાં આવ્યા છે. ટિલ્લુને બેભાન અવસ્થામાં હોસ્પિટલમાં લાવવામાં આવ્યો હતો. અહીં તબીબોએ તેને મૃત જાહેર કર્યો હતો. આ તરફ હુમલામાં ઘાયલ થયેલા રોહિતની સારવાર ચાલી રહી છે.
કોણ છે ટિલ્લુ તાજપુરિયા ?
પોલીસના જણાવ્યા અનુસાર, રોહિણી કોર્ટની અંદર કોર્ટ રૂમમાં ગેંગસ્ટર જિતેન્દ્ર ગોગીની હત્યામાં ટિલ્લુ સામેલ હતો. આ દરમિયાન દિલ્હી પોલીસે એન્કાઉન્ટરમાં ટિલ્લુ ગેંગના બે શૂટરોને ઠાર માર્યા હતા. જીતેન્દ્ર ગોગી અને ટિલ્લુ તાજપુરિયા વચ્ચે કોલેજકાળથી જ દુશ્મની હતી, તેઓ એકબીજા પર હુમલો કરતા હતા. ગેંગ વોરમાં બંને ગેંગના ડઝનેક લોકોએ જીવ ગુમાવ્યા છે. જોકે અધિકારીઓ એ જાણવાનો પ્રયાસ કરી રહ્યા છે કે, જીતેન્દ્ર ગોગીની હત્યા બાદ આ ઘટના બદલાની ભાવનાથી તો નથી ને.
ટિલ્લુ પર હત્યા-ગેરકાયદેસર વસૂલાતના પણ ઘણા કેસ
ટિલ્લુ વિરુદ્ધ હત્યા-ગેરકાયદેસર કબજો અને ખંડણી સહિતના ગુનાઓ નોંધાયેલા છે. કહેવાય છે કે, ગેંગસ્ટર જીતેન્દ્ર ગોગી અને ટિલ્લુ બેસ્ટ ફ્રેન્ડ હતા. પરંતુ કોલેજની ચૂંટણી દરમિયાન બંને વચ્ચે મુકાબલાની સ્થિતિ સર્જાવા લાગી હતી. આ માટે એક કારણ હતું. કારણ કે બંને અલગ-અલગ ઉમેદવારોના સમર્થનમાં પ્રચાર કરી રહ્યા હતા. કોલેજ છોડ્યા બાદ બંને ગુનાની દુનિયામાં આવ્યા. આ પછી બંનેએ એકબીજા પર હુમલો કરવાનું શરૂ કર્યું હતું.
