- ચંદ્ર પર 14 દિવસની રાત પછી સૂરજ ઊગશે
- રોવર અને લેન્ડર ચંદ્ર પર હજુ સાત દિવસ કામ કરશે
- ચંદ્ર 14 દિવસની રાતમાં કામ નહીં કરે
મિશન ચંદ્રયાન-3નો મહત્ત્વપૂર્ણ હિસ્સો રહેલ એમ.શ્રીકાંતે જણાવ્યું છે કે, ચંદ્ર પર 14 દિવસની રાત પછી સૂરજ ઊગશે, તો લેન્ડર અને રોવર ફરી કામ શરૂ કરી શકે છે. મીડિયા રિપોર્ટ અનુસાર એમ.શ્રીકાંતે જણાવ્યું છે કે, ચંદ્ર પર સૂરજનો પ્રકાશ હોય ત્યારે શક્ય હોય તેટલી જાણકારી મેળવી લેવામાં આવે. રોવર અને લેન્ડર ચંદ્ર પર હજુ સાત દિવસ કામ કરશે અને સૂરજ આથમી ગયા પછી કામ નહીં કરે. આ પ્રકારે થશે તો આપણા માટે સારું રહેશે અને આ પ્રકારે ના થાય તો પણ મિશન પૂર્ણ થઈ જશે.
ચંદ્ર 14 દિવસની રાતમાં કામ નહીં કરે
ચંદ્ર પર 23 ઓગસ્ટના રોજ સૂરજ નીકળ્યો હતો અને 14 દિવસ સુધી ત્યાં પ્રકાશ રહેશે. ત્યાં સુધી પ્રજ્ઞાન અને વિક્રમ પણ કામ કરતા રહેશે. સૂરજ આથમશે ત્યારે પ્રજ્ઞાન અને વિક્રમ નિષ્ક્રિય થઈ જશે. પ્રજ્ઞાન અને વિક્રમ પર સોલાર પેનલ છે, જે સૂરજના પ્રકાશમાંથી એનર્જી મેળવે છે. સૂરજ આથમે છે ત્યારે ચંદ્ર પર -203 ડિગ્રી તાપમાન થઈ જાય છે. પ્રજ્ઞાન અને વિક્રમ આ તાપમાનમાં કામ ના કરી શકે. જેથી ચંદ્ર પર 14 દિવસ રાત રહેશે, તો પ્રજ્ઞાન અને વિક્રમ કામ નહીં કરી શકે.
કેબિનેટે ચંદ્રયાન-3ની સફળતાને ઉભરતા ભારતનું પ્રતીક ગણાવ્યું
મંગળવારના રોજ પ્રધાનમંત્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળની બેઠક થઈ હતી. શરૂઆતમાં ચંદ્રયાન-3ના મિશનની સફળતા પર પ્રસ્તાવ પસાર કરવામાં આવ્યો. જેમાં જણાવવામાં આવ્યું હતું કે, આ મિશનની સફળતા ભારતના પ્રગતિશીલ વિચાર, આત્મનિર્ભરતા અને વૈશ્વિક મંચ પર ઊભરતા નવા ભારતની તાકાતનું પ્રતીક છે. કેબિનેટે બેઠક પછી સૂચના અને પ્રસારણ મંત્રી અનુરાગ ઠાકુરે જણાવ્યું કે, ‘કેબિનેટે 23 ઓગસ્ટને ‘રાષ્ટ્રીય અંતરિક્ષ દિવસ તરીકે જાહેર કરવાની સરાહના કરી છે. ભારત માટે તે ખૂબ જ ગૌરવની વાત છે. મિશન ચંદ્રયાનથી ચંદ્રના રહસ્યો વિશે જાણી શકાશે. અંતરિક્ષ મિશનમાં મહિલા વૈજ્ઞાનિકોનું મહત્ત્વપૂર્ણ યોગદાન છે. કેબેનિટે તમામ મહિલા વૈજ્ઞાનિકોને શુભકામના પાઠવી છે અને દેશના યુવાઓને વિજ્ઞાન સાથે જોડાવાની અપીલ કરી છે.’
ચંદ્ર પર ચંદ્રયાનના પદચિહ્ન
અનુરાગ ઠાકુરે જણાવ્યું હતું કે, ‘ચંદ્ર પર જે સ્થળે ચંદ્રયાન-2ના પદચિહ્ન પડ્યા હતા તેનું નામ તિરંગા અને ચંદ્રયાન-3એ જ્યાં લેન્ડ કર્યું તેનું નામ શિવશક્તિ રાખવાના નિર્ણયને કેબિનેટે આવકાર્યો છે. કેબિનેટે વિશ્વાસ વ્યક્ત કર્યો છે કે, અંતરિક્ષ ક્ષેત્રે ભારતે મેળવેલ સફળતા ઉભરતા ભારતનું પ્રતીક છે. જે પ્રગતિશીલ વિચાર, આત્મનિર્ભરતા અને વૈશ્વિક દ્રષ્ટિકોણનું પ્રતિબિંબ છે.’
