- કોંગ્રેસનની આગેવાનીવાળા ઈન્ડીયા ગઠબંધનને બીજો મોટો ઝટકો
- પંજાબમાં લોકસભા ચૂંટણી એકલા લડવાનો AAPનો નિર્ણય
- મમતા બેનરજી પણ બંગાળમાં એકલા ચૂંટણી લડવાની કરી ચૂક્યા છે જાહેરાત
2024ની લોકસભા ચૂંટણી માટે ભેગા થયેલા વિપક્ષને આજે ઉપરાઉપરી બે ઝટકા લાગ્યાં છે. લોકસભા ચૂંટણી માટે ઈન્ડીયા ગઠબંધન બનાવનાર કોંગ્રેસને બીજો ઝટકો લાગ્યો છે. હવે આમ આદમી પાર્ટીએ પંજાબની બધી 13 લોકસભા બેઠકો એકલે હાથે લડવાનું એલાન કર્યું છે. પંજાબમાં લોકસભાની 13 બેઠકો છે.
લોકસભા ચૂંટણી પહેલા વિખરાયું ઈન્ડીયા ગઠબંધન
આજે ઈન્ડીયા ગઠબંધન બે રાજ્યોમાં વિખેરાઈ ગયું છે. બંગાળમાં પણ મમતા બેનરજીએ એકલે હાથે લોકસભા ચૂંટણી લડવાનું એલાન કર્યું છે જે પછી બીજી મોટી પાર્ટી આમ આદમી પાર્ટીએ પણ પંજાબમાં એકલે હાથે ચૂંટણી લડવાનું એલાન કર્યું છે. આમ આદમી પાર્ટીએ પંજાબની 13 લોકસભા બેઠકો માટે 40 ઉમેદવારોની પસંદગી કરી છે અને અંતિમ ઉમેદવારનુ નામ નક્કી કરવા માટે સર્વે કરી રહી છે.
બંગાળમાં કોંગ્રેસ સાથે ગઠબંધન કરવાનો મમતાનો ઈન્કાર
મમતા બેનરજીએ પણ બંગાળમાં કોંગ્રેસ સાથે ગઠબંધનનો ઈન્કાર કર્યો છે. તેમણે કહ્યું કે ટીએમસી એકલે હાથે લોકસભાની ચૂંટણી લડશે અને ચૂંટણી બાદ ગઠબંધનનો નિર્ણય લેવાશે.
ચૂંટણી આવતાં આવતાં વધુ સાથીઓ ફાડશે છેડો
રાજકીય પંડિતો માની રહ્યાં છે કે જેમ જેમ લોકસભા ચૂંટણી નજીક આવશે તેમ તેમ ગઠબંધનના સાથીઓ છેડો ફાડી લેશે. યુપી અને બિહાર જેવા મોટા રાજ્યમાં પણ ઈન્ડીયા ગઠબંધનને મોટો ઝટકો લાગી શકે છે. યુપીમાં અખિલેશ યાદવ અને બિહારમા નીતિશ કુમાર-લાલુ ઈન્ડીયાનો ખેલ બગાડી શકે છે.
ઈન્ડીયા ગઠબંધનમાં 26 પાર્ટીઓ
ઉલ્લેખનીય છે કે લોકસભા ચૂંટણી પહેલા કોંગ્રેસની આગેવાનીમાં 26 પાર્ટીઓ એકમંચ પર આવી હતી અને લોકસભા ચૂંટણીનું એલાન કર્યું હતું. પરંતુ હવે લાગે છે કે દરેક પાર્ટીની રાજકીય મહત્વકાંક્ષા વધી રહી છે અને લોકસભા ચૂંટણીમાં વધારેમાં વધારે બેઠકો માગી રહી છે. જોકે ગઠબંધનની આગેવાની કરી કોંગ્રેસ વધારે ભાગ લેવા માગે છે તેથી હવે સાથીઓની એક્ઝિટ શરુ થઈ છે.
