- ગુજરાતમાં હવે વરસાદનું જોર ઘટશે
- 'હજુ બે-ચાર દિવસ વરસાદી માહોલ રહે તેવી શક્યતા'
- 'ઓક્ટોબરમાં લોકોને વાવાઝોડા માટે તૈયાર રહેવું પડશે'
અમદાવાદ સહિત રાજ્યના કેટલાક વિસ્તારમાં વરસાદનાં હળવાં ઝાપટાં પડી રહ્યાં છે. હજુ બે-ચાર દિવસ આ માહોલ રહે તેવી શક્યતા છે, જોકે ગુજરાત માટે સારા સમાચાર એ છે કે હવે રાજ્યમાંથી વરસાદનું જોર ઘટતું જશે. દક્ષિણ-પશ્ચિમ રાજસ્થાનથી વરસાદના વિદાયની શરૂઆત થઈ ચૂકી હોઈ રાજ્યમાં વરસાદ ઓછો થવાની શક્યતા છે તેમ સ્થાનિક હવામાન વિભાગ જણાવે છે.
24 જિલ્લાના 76 તાલુકામાં વરસાદ
ગાંધીનગર સ્થિત સ્ટેટ ઈમર્જન્સી ઓપરેશન સેન્ટરનાં સૂત્રોના જણાવ્યા મુજબ છેલ્લા 24 કલાકમાં રાજ્યમાં માત્ર ૩.૯૬ મિ.મી. વરસાદ પડ્યો હતો. રાજ્યના 24 જિલ્લાના 76 તાલુકામાં વરસાદ નોંધાયો હતો, જે પૈકી સુરત શહેરમાં સૌથી વધુ અઢી ઇંચ જેટલો વરસાદ પડ્યો હતો. જૂનાગઢના વીસાવદર, વલસાડના કપરાડામાં લગભગ બે ઇંચ, નવસારીના ખેરગામ, ભરૂચના ઝઘડિયા, બનાસકાંઠાના અમીરગઢ, અમરેલી તાલુકા અને સાબરકાંઠાના પોશિના તથા તાપીના નિઝરમાં દોઢ ઇંચ જેટલો વરસાદ નોંધાયો હતો. સુરતના ચોર્યાસીમાં, નવસારીના વાંસદા, નવસારી, છોટાઉદેપુર તાલુકા તેમજ અરવલ્લીના ભિલોડા, તાપીના દોલવણમાં એક ઇંચ જેટલો વરસાદ વરસ્યો હતો. મહેસાણાના જોટાણા, નર્મદાના તિલકવાડા, સુરતના માંડવીમાં પોણો ઇંચથી વધુ વરસાદ નોંધાયો હતો. આણંદના સોજિત્રા, અમરેલીના લાઠી, ગાંધીનગરના કલોલ, અરવલ્લીના મેઘરજ અને મોડાસા, સુરતના મહુવા, ડાંગના સુબીર, છોટાઉદેપુરના કવાંટ, આણંદના તારાપુર, વલસાડના ધરમપુર અને ઉમરગામમાં અડધો ઇંચ જેટલો વરસાદ પડ્યો હતો.
રાજ્યના 11 તાલુકામાં વરસાદ વરસ્યો
જ્યારે આજે સવારના છથી દસ વાગ્યા વચ્ચે સ્ટેટ ઈમર્જન્સી ઓપરેશન સેન્ટરનાં સૂત્રોના જણાવ્યા મુજબ અમદાવાદના ધોલેરામાં દોઢ ઇંચ જેટલો વરસાદ વરસ્યો હતો. બોટાદના રાણપુરમાં એક ઇંચ અને નવસારીના ગણદેવી તેમજ ભરૂચના જંબુસરમાં અડધો ઇંચ વરસાદ નોંધાયો હતો. આજે સવારના ચાર કલાકના સમયગાળામાં રાજ્યના 11 તાલુકામાં વરસાદ વરસ્યો હતો.
.jpg)
હળવાથી મધ્ય પ્રકારનો વરસાદ પડી શકે
રાજ્યમાં આજે દક્ષિણ ગુજરાતના તમામ જિલ્લા, દમણ, દાદરા-નગર હવેલી તેમજ અમદાવાદ, આણંદ, મહીસાગર, અરવલ્લી, ખેડા, જૂનાગઢ, અમરેલી, ભાવનગર, ગીર-સોમનાથ અને દીવમાં હળવાથી મધ્ય પ્રકારનો વરસાદ પડી શકે છે. કેટલીક જગ્યાએ ગાજવીજ સાથે વરસાદ પડશે. આવતી કાલે સુરત, ડાંગ, તાપી, નવસારી, વલસાડ, દમણ, દાદરા-નગર હવેલી, જૂનાગઢ, અમરેલી, ભાવનગર, ગીર-સોમનાથ અને દીવમાં હળવો વરસાદ પડવાની સંભાવના છે.
તા. 29 સપ્ટેમ્બરે ડાંગ, નવસારી, વલસાડ, દમણ, દાદરા-નગર હવેલીના છૂટાછવાયા વિસ્તારોમાં હળવો વરસાદ પડશે. રાજ્યના અન્ય વિસ્તારોમાં હવામાન સૂકું રહેશે. તા. 30 સપ્ટેમ્બર, તા. 1 ઓક્ટોબર અને તા. 2 ઓક્ટોબરે રાજ્યમાં ક્યાંય પણ હળવા કે મધ્યમ પ્રકારનો વરસાદ પડવાની આગાહી હવામાન વિભાગ દ્વારા કરાઈ નથી. તા. 30 સપ્ટેમ્બરથી રાજ્યમાં મહદ્અંશે હવામાન સૂકું રહેશે.
ચોમાસાના વિદાયની પ્રક્રિયા હવે શરૂ થશે
બીજી તરફ કેટલાક હવામાન નિષ્ણાતો જણાવે છે કે ચોમાસાના વિદાયની પ્રક્રિયા હવે શરૂ થશે, જોકે ચોમાસું વિદાય લેવા છતાં પણ છૂટોછવાયો વરસાદ રાજ્યમાં વરસી શકે છે, કેમ કે અરબી સમુદ્રમાં તા.28 સપ્ટેમ્બરે સિસ્ટમ સક્રિય થશે, જેના કારણે રાજ્યમાં વરસાદી માહોલ રહી શકે છે. દક્ષિણ ગુજરાતના કેટલાક ભાગો અને સૌરાષ્ટ્રના દરિયાઈ વિસ્તારોમાં આ સમયગાળા દરમિયાન વરસાદ પડવાની વકી છે. બીજી તરફ ગરમીનું જોર વધશે અને ઓક્ટોબરમાં લોકોને વાવાઝોડા માટે તૈયાર રહેવું પડશે.
અમદાવાદમાં હજુ બે દિવસ વરસાદનાં હળવાં ઝાપટાં પડશે
શહેરમાં આજે અને આવતી કાલે વાદળછાયા વાતાવરણની સાથે હળવાં વરસાદી ઝાપટાં પડી શકે છે. ઉપરાંત તા.3 ઓક્ટોબર સુધી શહેરનું આકાશ અંશતઃ વાદળછાયું રહેશે. ગઈ કાલે અમદાવાદમાં 34.5 ડિગ્રી સેલ્સિયસ ગરમી નોંધાઈ હતી, જ્યારે આજે સવારે 26.5 ડિગ્રી લઘુતમ તાપમાન નોંધાયું હતું, જે સામાન્ય કરતાં બે ડિગ્રી વધુ હતું.
