- ભારતમાં ફેલાઈ ટોમેટો ફીવર નામની નવી બીમારી
- કેરળ અને ઓડિશામાં 82થી વધારે કેસ
- 5 વર્ષના બાળકો બની રહ્યાં છે ટોમેટો ફીવરનો ભોગ
ભારત હવે બીમારીઓનું ઘર બની રહ્યું છે. નવી નવી બીમારીઓનું અહીં આવવાનું ચાલું થયું છે. હાલમાં કોરોના અને મંકિપોક્સનો પ્રકોપ ચાલું જ છે ત્યાં વળી હવે નાના બાળકોને ચપેટે ચડાવતી નવી બીમારી સામે આવતા ફફડાટ વ્યાપ્યો છે.
દેશમાં વધ્યો ટોમેટો ફીવરનો કોપ, 5 વર્ષના 82 બાળકો બન્યાં બીમાર
ભારતમાં ટોમેટો ફીવર નામની બીમારીનો કોપ વધ્યો છે. 5 વર્ષના બાળકો આ બીમારીની સૌથી વધારે ચપેટમાં આવી રહ્યાં છે તેથી બાળકોને સાચવવાની વધારે જરુર છે. 6 મેના દિવસ કેરળના કોલ્લમમાં ટોમેટો ફીવરનો પહેલો કેસ સામે આવ્યો હતો અને હવે લાન્સેટના રિપોર્ટ અનુસાર, અત્યાર સુધી ટોમેટો ફીવરથી 82 બાળકો સંક્રમિત થયા છે. આ તમામ બાળકો 5 વર્ષ કરતા નાના છે.
લાન્સેટના રિપોર્ટમાં અપાઈ ભયાનક ચેતવણી
લાન્સેટના રિપોર્ટમાં એવું જણાવાયું છે કે દેશમાં ટોમેટો ફીવર નામની નવી બીમારી એક સમસ્યા બની રહી છે. આ વાયરસ કેરળમાં પાંચ વર્ષથી ઓછી ઉંમરના બાળકોને ઘેરી રહ્યો છે. રિપોર્ટ અનુસાર કેરળના ઝોનલ વિસ્તારો જેવા કે આર્યંકાવુ અને નેદુવાતુરમાં તેનો ફેલાવો થઇ રહ્યો છે. અચાનક આ બીમારી ફેલાયા બાદ પાડોશી રાજ્યો તમિલનાડુ અને કર્ણાટકમાં એલર્ટ જાહેર કરી દેવામાં આવ્યું છે.
ટોમેટો ફીવર દુર્લભ પ્રકારનો વાયરલ રોગ
ટોમેટો ફીવર એક દુર્લભ પ્રકારનો વાયરલ રોગ છે. આ રોગમાં ચામડી પર લાલ ધબ્બા પડીને વારંવાર ખંજવાળ આવે છે અને ડિહાઇડ્રેશનની સમસ્યા રહે છે. જોકે આ રોગને ટામેટાં સાથે કોઈ લેવાદેવા નથી, પરંતુ તેને ટમેટા-ફ્લૂ કહેવામાં આવે છે કારણ કે આ રોગમાં ફોલ્લીઓ ટામેટાંને મળતી આવે છે અને પાંચ વર્ષથી ઓછી ઉંમરના બાળકોને ઘેરી લે છે.
ટોમેટો ફીવરના લક્ષણો
- ત્વચા પર ફોલ્લીઓ
- ભારે તાવ
- શરીરમાં ખેંચાણ
- સાંધામાં સોજો
- ડિહાઇડ્રેશન
- થાક
ટોમેટો ફીવરના લક્ષણો દેખાય તો શું કરવું
ટોમેટો ફ્લૂના લક્ષણો દેખાય તો તરત જ બાળકને કોઈ સારા ડોક્ટરને બતાવો. બાળકને ખંજવાળ ન આવે અને તેની સ્વચ્છતા યોગ્ય રીતે થાય તેનું ધ્યાન રાખવું પડશે. બાળકને પૂરતો આરામ પણ આપવો પડશે.
