ભેટ / CM સિદ્ધારમૈયાને પત્નીએ આપી ભેટ, મંચ પર દેખાડ્યાં વગર ન રહી શક્યા, ડીકે શિવકુમાર જોતા જ રહી ગયા

• સિદ્ધારમૈયા રવિવારે રાડો કંપનીની ઘડિયાળ સાથે જોવા મળ્યા
• પત્ની પાર્વતીએ સીએમ બનવાના અવસર પર આપી છે ગિફ્ટ
• ડિ.કે. શિવકુમારે ઉત્સુકતા સાથે આંખો ખેંચીને નિહાળી વોચ

કર્ણાટકની ચૂંટણીમાં કોંગ્રેસની જબરદસ્ત જીત બાદ નવનિયુક્ત મુખ્યમંત્રી તરીકે સિદ્ધારમૈયા આરુઢ થયા છે. ત્યારે રવિવારે તેઓ રાડો કંપનીની ઘડિયાળ સાથે જોવા મળ્યા હતા. આ ઘડિયાળ તેમની પત્ની પાર્વતીએ તેઓને કર્ણાટકના ફરીથી સીએમ બનવાના અવસર પર ગિફ્ટ આપી હોવાનું જણાય રહ્યું છે. સિદ્ધારમૈયાએ તેમના ડેપ્યુટી ડિ.કે. શિવકુમારને આ ઘડિયાળ બતાવી હતી. ત્યારે ડિ.કે. શિવકુમારે ઉત્સુકતા સાથે આંખો ખેંચીને નિહાળી હતી.

રાજીવ ગાંધીની પુણ્યતિથિ નિમિતે કાર્યક્રમ
21 મે રવિવારે પૂર્વ વડાપ્રધાન રાજીવ ગાંધીની પુણ્યતિથિ હતી. જેના ભાગરૂપે કર્ણાટક ખાતે કોંગ્રેસ દ્વારા એક કાર્યક્રમનું આયોજન કરાયું હતું. આ વેળાએ મંચ પર ઉપસ્થિત સિદ્ધારમૈયા પિતાની પત્ની દ્વારા ગિફ્ટમાં મળેલ ભેટ બતાવતા પોતાને રોકી શક્યા ન હતા. સિદ્ધારમૈયાએ સૌપ્રથમ મંત્રી એમ.બી પાટીલને પોતાની ઘડિયાળ બતાવી હતી. ત્યારબાદ ડેપ્યુટી સીએમ ડીકે શિવકુમારને પણ પોતાની ઘડિયાળ બતાવતા રોકી ન શક્યા અને પોતે ઘડિયાળ દેખાડી હતી. આ અવસરે ડીકે શિવકુમારે પણ ભારે ઉત્સુકતા સાથે ઘડિયાળ પોતાના હાથે ટચ કરીને નિહાળી હતી.

અગાઉ 70 લાખ રૂપિયાની કિંમતની ઘડિયાળનો મુદ્દો ગાજયો હતો

આ દરમિયાન સિદ્ધારમૈયા હળવા અંદાજમાં જોવા મળ્યા હતા. જે ઘડિયાળ મામલે એમ.બી. પાટીલે જ ફોડ પાડ્યો હતો અને પત્રકારો સાથેની વાતચીતમાં કહ્યું કે સિદ્ધારમૈયાની પત્નીએ આ ઘડિયાળ સિદ્ધારમૈયાને ગિફ્ટ કરી છે. મહત્વનું છે કે વર્ષ 2016માં સિદ્ધારમૈયા સીએમ હતા, ત્યારે ઘડિયાળનો મુદ્દો ખૂબ ગાજયો હતો. તેઓની હીરા જડેલી ઘડિયાળને લઈને વિવાદ સર્જાયો હતો. જેતે વખતે સવાલો ઉઠતા તેઓએ જણાવ્યું કે દુબઈના ડૉ. ગિરીશ વર્માએ તેમને ભેટ આપી હતી. જોકે બાદમાં 70 લાખ રૂપિયાની કિંમતની ઘડિયાળને તેઓએ વિધાનસભા સચિવાલયમાં જમા કરાવી દીધી હતી.