અલર્ટ / AIIMSના ડાયરેક્ટરે કહ્યું, કોરોનાના કેસ ભલે ઘટ્યાં પરંતુ હવે વધારે ચેતજો, કારણ કે...

• કોરોના શિયાળામાં સ્વાઈન ફ્લૂની જેમ ઝડપથી ફેલાઈ શકે છે
• સ્વાઇન ફ્લૂ શિયાળામાં ઝડપથી ફેલાય છેઃ ડો. ગુલેરિયા
• પ્લાઝમા કોઈ મેજિક બુલેટ નથીઃ ડો. ગુલેરિયા

ડો. ગુલેરિયાએ ગંભીર ચેતવણી આપતાં કહ્યું કે સ્વાઇન ફ્લૂ શિયાળામાં ઝડપથી ફેલાય છે. આ રીતે કોવિડ પણ ફેલાશે. આ વાતના પણ પુરાવા છે કે વાયુ પ્રદૂષણ પણ કોવિડ-૧૯ના પ્રસારમાં ઘણી હદ સુધી મદદ કરશે. તેના પર ઇટાલી અને ચીનમાં થોડા મહિના પહેલાં અભ્યાસ કરવામાં આવ્યો છે. 

બીજી તરફ ડો. રણદીપ ગુલેરિયાએ આઈસીએમઆરના તે દાવા પર પણ પ્રતિક્રિયા આપી, જેમાં કહેવામાં આવ્યું છે કે પ્લાઝમા થેરપીથી કોરોનાથી થતાં મોતમાં ઘટાડો થયો નથી. તેમણે કહ્યું કે આ ઉતાવળ હશે. હજુ અમારે વધુ ડેટાની રાહ જોવી જોઈએ. આઈસીએમઆરના અભ્યાસમાં જે દર્દીઓ પર અભ્યાસ કરવામાં આવ્યો તેમાંથી મોટા ભાગનામાં પહેલાંથી એન્ટિબોડી હતા. જો તમારામાં પહેલાંથી એન્ટિબોડી છે તો બહારથી તેને આપવાથી કોઈ ખાસ લાભ થતો નથી. 

તેમણે કહ્યું પ્લાઝમા કોઈ મેજિક બુલેટ નથી. અમારે તેનો ત્યાં ઉપયોગ કરવાનો છે જ્યાં તેની ખૂબ જરૂર છે. તે દાવો કરવો ખોટો છે કે તે બધાં માટે લાભકારી છે. કોરોનાથી આપણે શીખ્યાં છીએ કે સારવારમાં યોગ્ય સમયનું ખાસ મહત્ત્વ છે. ઉલ્લેખનીય છે કે આ અગાઉ રાષ્ટ્રના નામે પોતાના સંબોધનમાં પીએમ મોદીએ લોકોને સાવધાની રાખવાની અપીલ કરી હતી. તેમણે કહ્યું કે જ્યાં સુધી સંપૂર્ણ સફળતા ન મળી જાય ત્યાં સુધી બેદરકારી ન કરવી જોઈએ. જ્યાં સુધી આ કોરોના મહામારીની વેક્સિન ન આવી જાય, આપણે આ લડાઈને નબળી પડવા દેવી નથી.