- દિવાળીના મુહૂર્ત ટ્રેડિંગની શરૂઆતમાં આવકારદાયક તેજી
- રોકાણકારોને એક સેકન્ડમાં રૂ. 3 લાખ કરોડથી વધુની કમાણી
- નિફ્ટી 19500 પોઈન્ટને પાર કરી ગયો
દિવાળીના પાવન પર્વ પર ભારતીય શેરબજારમા શાનદાર શરૂઆત કરી છે. મુહૂર્ત ટ્રેડિંગ દરમિયાન મુખ્ય સૂચકાંકો BSE સેન્સેક્સ અને NSE નિફ્ટીમાં તેજીના પ્રાણ પુરાતા રોકાણમાં વળતર માટે ઉજળા સંજોગો જોવા મળ્યા હતાં. એક કલાકના સ્પેશિયલ ટ્રેડિંગના અંતે બજાર 350થી વધુ પોઈન્ટના વધારા સાથે બંધ થયું. દિવાળીના મુહૂર્ત ટ્રેડિંગની શરૂઆતમાં BSE 500 થી વધુ પોઈન્ટના ઉછાળા સાથે ખુલતા રોકાણકારોને બખ્ખા બોલી ગયા હતાં. એક સેકન્ડમાં રૂ. 3 લાખ કરોડથી વધુની કમાણી રોળી નાખી હતી. જ્યારે નિફ્ટી 19500 પોઈન્ટને પાર કરી ગયો હતો.
હિન્દુ ધર્મના સૌથી મોટા પર્વ મનાતા દિવાળી નિમિત્તે દેશમાં વેપારી વર્ગ ધનની દેવી લક્ષ્મીની પૂજા કરે છે. શેરબજાર માટે પણ દિવાળી ખૂબ મહત્વની હોય છે. BSEનો મુખ્ય સૂચકાંક 65,418.98 પોઈન્ટ પર પહોંચ્યો હતો. આથી રોકાણકારોને 3 લાખ કરોડ રૂપિયાથી વધુની આવક થઈ હતી. ખાસ વાત તો એ છે કે બજાર ખુલ્યાની 6 મિનિટમાં 345.26 પોઈન્ટના વધારા સાથે 65,235.78 પોઈન્ટ પર ટ્રેડ કરી રહ્યું હતું.. બીએસઈના 30 શેર લીલા નિશાનમાં ટ્રેડ થઈ રહ્યા છે. આઈટી કંપનીઓમાં સારો ગ્રોથ જોવા મળી રહ્યો છે. બીજી તરફ નિફ્ટી પણ 100થી વધુ પોઈન્ટના વધારા સાથે 19500 પોઈન્ટથી વધુના વધારા સાથે ટ્રેડ થઈ રહ્યો છે.
દિવાળીના દિવસે બજારમાં ખાસ ટ્રેડિંગ સેશનનું આયોજન કરાઈ છે. આ ટ્રેડિંગ સેશનને મુહૂર્ત ટ્રેડિંગ કહેવામાં આવે છે. દિવાળી પર મુહૂર્તના વેપાર માટે બજાર માત્ર એક કલાક માટે ખુલે છે. રવિવાર હોવા છતાં બજાર ખુલ્યું હતું. મુહૂર્ત ટ્રેડિંગના વિશેષ સત્ર માટે બજાર સાંજે 6.15 વાગ્યે ખુલ્યું હતું. સેન્સેક્સે 500થી વધુ પોઈન્ટના ઉછાળા સાથે નવી સિઝનના શ્રી ગણેશ કર્યા બાદ સેન્સેક્સ 64,904.68 પોઈન્ટ પર સ્થિર થયો હતો.
શુક્રવારે BSEનું માર્કેટ કેપ રૂ. 3,20,29,232.24 કરોડ હતું. જ્યારે આજે મુહૂર્તમા માર્કેટ કેપ 3,23,38,359.97 કરોડ રૂપિયા પર પહોંચી ગયું છે. જેનો સીધો અર્થ સમજીએ તો BSEના માર્કેટ કેપમાં એક સેકન્ડમાં રૂ. 3,09,127.73 કરોડનો વધારો થયો છે. આમ શેરબજાર ખુલતાની સાથે જ કારણે રોકાણકારોએ બજાર ખુલતાની સાથે જ 3 લાખ કરોડ રૂપિયાની કમાણી કરી હતી.
