- હિંસક ઝડપમાં ચીનની સેનાના કમાન્ડિંગ ઓફિસરનું પણ થયું મૃત્યું
- સૂત્રોના જણાવ્યા મુજબ ચીનના 40થી વધારે સૈનિકના મૃત્યું થયાં
જ્યારે બીજી તરફ LAC પર ચીનની અવળચંડાઇ જારી છે. ગઇકાલથી સતત વાતચીત ચાલી છે, જો કે તેમ છતાં ચીન પોતાનું વલણ કડક રાખી રહ્યું છે. LAC પર સતત તણાવ બનેલો જોવા મળી રહ્યો છે. ભારતીય સેનાએ લદ્દાખ સિવાય LAC સિવાયના ભાગ પર સેનાને એલર્ટ કરી દીધી છે. શ્રીનગર-લેહ હાઇવે સામાન્ય જનતા માટે બંધ કરી દેવામાં આવ્યો છે.
સૂત્રોને મળેલી જાણકારી મુજબ આ હિંસક અથડામણમાં ચીનની સેનાને ભારે નુકસાન પહોંચ્યું છે. ગલવાનની ઉપર ચીનના હેલિકોપ્ટર ઉડતા જોવા મળ્યાં છે. ગલવાન નદીના કિનારે ચીનની પોસ્ટ પર એમ્બ્યુલેન્સની અવરજવર પણ જોવા મળી. સૂત્રોના જણાવ્યાં અનુસાર આ અથડામણમાં ચીનના અંદાજે 40થી વધારે સૈનિકના મૃત્યુ થયા છે.
ચીનના સૈનિકોના મોત પરંતુ ડ્રેગન સ્વીકારવા તૈયાર નહીં
પૂર્વ લદ્દાખની ગલવાન ઘાટીમાં ચીન સાથે થયેલી હિંસક અથડામણમાં ભારતના ઓછામાં ઓછા 20 જવાન શહીદ થયા છે. જ્યારે આ અથડામણમાં ચીનને પણ ભારે નુકસાન પહોંચ્યું છે. જેમાં ચીનના પણ 43 સૈનિકો ઇજાગ્રસ્ત કે મૃત્યુ પામ્યા છે તેવા સૂત્રો દ્વારા સમાચાર મળ્યાં છે. આ વચ્ચે LACની બીજી તરફ ચીનના હેલિકોપ્ટર જોવા મળ્યાં છે. સૂત્રોને મળતી જાણકારી મુજબ આ હેલિકોપ્ટરમાં મૃત અને ઘાયલ સૈનિકોને એરલિફ્ટ કરવામાં આવી રહ્યાં છે. જો કે ચીની મીડિયામાં તેમના સૈનિકોના મોતને લઈને કોઈ ખબર છપાઈ ન હતી અને માત્ર અથડામણ થઈ હતી તેવું કવરેજ કરાયું હતું.
સોમવારે રાતે થયેલી હિંસક અથડામણમાં ભારતના 20 જવાન શહીદ
LAC પર સોમવારે ચીન સાથે થયેલી હિંસક અથડામણમાં ભારતના 20 જવાનો શહીદ થયા છે તેવું સરકારી સૂત્રો દ્વારા જાણવા મળ્યું હતું ત્યાર બાદ ભારતીય સેનાએ પણ આ વાતની પુષ્ટિ કરી હતી. અગાઉ મંગળવારે બપોરે સત્તાવાર રીતે એક ઓફિસર અને 2 જવાનો શહીદ થયા હોવાની ખબર સામે આવી હતી ત્યારે હવે સત્તાવાર રીતે પ્રાપ્ત થયેલી જાણકારી મુજબ આ હિંસક અથડામણમાં 20 જવાનો શહીદ થયા છે. સોમવાર રાત્રે બંને દેશો વચ્ચે સેનાઓની વચ્ચે હિંસક અથડામણ દરમ્યાન આ ઘટના બની હતી. આ ઘટના ત્યારે બની જ્યારે સોમવારે રાતે ગલવાન ઘાટી પાસે બંને દેશો વચ્ચે વાતચીત બાદ સ્થિતિ સામાન્ય થવા તરફ વધી રહી હતી.
જવાનોની શહાદત દેશ નહીં ભૂલે : રાજનાથ સિંહ
ભારત અને ચીનની સરહદ પર ગલવાન ઘાટીમાં શહીદ થયેલા ભારતના 20 જવાનોને રક્ષામંત્રી રાજનાથસિંહે શ્રદ્ધાંજલી આપી છે. રક્ષામંત્રી રાજનાથસિંહે પોતાના ટ્વિટ પરથી નિવેદન જારી કર્યું છે. રાજનાથસિંહે લખ્યું કે ગલવાન ઘાટીમાં સેનાના જવાનોએ પોતાની ફરજ નિભાવતાં પોતાનો જીવ આપ્યો છે, દેશ તેમના બલિદાનને ક્યારેય ભુલી નહીં શકે. રાજનાથસિંહે ટ્વિટ કરી લખ્યું છે કે ગલવાન ઘાટીમાં સૈનિકોને ગુમાવવા દર્દનાક છે. આપણા સૈનિકોએ પોતાની ફરજ નિભાવતા દેશ માટે જીવ આપ્યો છે. દેશ તેમના બલિદાનને ક્યારેય ભૂલી શકશે નહીં.
