- ભારત અને અફઘાનિસ્તાન વચ્ચે T20 શ્રેણી 11 જાન્યુઆરીથી શરૂ થશે
- સિરીઝ પહેલા જ્યારે ભારતીય ટીમની જાહેરાત કરવામાં આવી હતી
- અફઘાનિસ્તાન સામેની સિરીઝમાં ઈશાન કિશનને પડતો મુકવામાં આવ્યો
ટીમ ઈન્ડિયાના વિકેટકીપર બેટ્સમેન ઈશાન કિશને ભારત માટે અત્યાર સુધીમાં બે ટેસ્ટ, 27 વનડે અને 32 ટી20 ઈન્ટરનેશનલ મેચ રમી છે. ઇશાન કિશન ICC વર્લ્ડ કપ 2023 પછી ભારત વિરુદ્ધ ઓસ્ટ્રેલિયા T20 આંતરરાષ્ટ્રીય શ્રેણી માટે ભારતીય ટીમનો ભાગ હતો અને તેને પ્લેઇંગ ઇલેવનમાં રમવાની તક પણ મળી હતી. આ પછી તે દક્ષિણ આફ્રિકાના પ્રવાસ પર ટી20 ટીમ માટે ભારતીય ટીમનો ભાગ હતો, પરંતુ તેને રમવાની તક મળી ન હતી. ઇશાન કિશન માનસિક થાકનું કારણ આપીને દક્ષિણ આફ્રિકા પ્રવાસથી પરત ફર્યો હતો. એવા અહેવાલો આવવા લાગ્યા કે ઈશાન કિશનને ટીમમાં રાખવા છતાં તેને રમવાની તક નથી મળી રહી, જેના કારણે તે કદાચ નારાજ છે.25 વર્ષના ઈશાન કિશનની મુશ્કેલીઓ ત્યારે વધી ગઈ જ્યારે દુબઈમાં તેની પાર્ટી કરવાના સમાચારો સામે આવવા લાગ્યા.
પ્લેઈંગ ઈલેવનમાં જગ્યા ન મળતા નારાજ
એક સમાચાર મુજબ ઈશાન કિશન એ વાતથી નાખુશ હતો કે તેને પ્લેઈંગ ઈલેવનમાં જગ્યા ન મળી રહી હતી. ઈશાન કિશને વર્લ્ડ કપ 2023 બાદ ઓસ્ટ્રેલિયા સામેની પાંચ મેચની T20 ઈન્ટરનેશનલ સિરીઝમાંથી રાહત માંગી હતી, પરંતુ બોર્ડ ઓફ કંટ્રોલ ફોર ક્રિકેટ ઇન ઈન્ડિયા (BCCI)એ તેની અરજી ફગાવી દીધી હતી. શ્રેણીની ત્રણ મેચ બાદ તેને છેલ્લી બે મેચ માટે આરામ મળ્યો હતો, પરંતુ તેમ છતાં તેને ટીમ સાથે રાખવામાં આવ્યો હતો. ઈશાન દક્ષિણ આફ્રિકા પ્રવાસ પર સફેદ બોલની ક્રિકેટમાંથી બ્રેક ઈચ્છતો હતો, પરંતુ ટેસ્ટ શ્રેણીનો ભાગ બનવા ઈચ્છતો હતો. પરંતુ ફરીથી તેમની વિરામ માટેની વિનંતી નકારી કાઢવામાં આવી હતી. ઈશાન દક્ષિણ આફ્રિકા પ્રવાસ પર પ્રથમ ટેસ્ટ ટીમનો ભાગ હતો, પરંતુ બાદમાં તેણે પોતાનું નામ પાછું ખેંચી લીધું હતું. દક્ષિણ આફ્રિકાના પ્રવાસે જતા પહેલા પણ ઈશાન અને બીસીસીઆઈ વચ્ચે બધુ બરાબર ચાલી રહ્યું ન હતું.
વધુ વાંચો : મહોમ્મદ શમીને મળ્યો પણ ધોનીથી લઈને નેહરા સુધી આ 4 સ્ટાર ક્રિકેટર્સ ન જીતી શક્યા અર્જુન ઍવોર્ડ
માનસિક સ્વાસ્થ્ય પર અસર
એક સૂત્રના કહેવા મુજબ તેણે ટીમ મેનેજમેન્ટને કહ્યું કે તે માનસિક થાક અનુભવી રહ્યો છે કારણ કે તે સતત ટીમ સાથે છે અને તેના પરિવાર સાથે સમય પસાર કરવા માંગે છે. પરંતુ આ પછી તે દુબઈ ગયો અને ત્યાં પાર્ટી કરતો જોવા મળ્યો. ઈશાન કિશનની નજીકના એક સૂત્રએ કહ્યું કે, એકવાર તેને બ્રેક આપવામાં આવે તો તે જ્યાં સમય પસાર કરી રહ્યો છે તેનાથી શું ફરક પડે છે? તે રમતમાંથી થોડો સમય કાઢવા માંગતો હતો કારણ કે તે સતત ટીમ સાથે પ્રવાસ કરતો હતો. તેને રમવાની તક મળી રહી ન હતી અને તેનાથી તેના માનસિક સ્વાસ્થ્ય પર અસર થઈ રહી હતી. તે તેના ભાઈના જન્મદિવસમાં હાજરી આપવા માટે દુબઈ આવ્યો હતો. એવું માનવામાં આવે છે કે ઈશાન કિશને અફઘાનિસ્તાન સામે ટી20 સીરીઝ રમવાની ઈચ્છા વ્યક્ત કરી હતી, પરંતુ તેને ટી20 ટીમમાંથી બહાર કરી દેવામાં આવ્યો હતો.
