- નવસારીમાં ચીખલી તાલુકાના પીપલ ગભાણ ગામની ઘટના
- પ્રાથમિક શાળાના ભોજનમાં નીકળી ગરોળી
- ભોજન બનાવનારા કર્મી વિરુદ્ધ કાર્યવાહી થશે?
નવસારીના ચીખલી તાલુકાના પીપલ ગભાણગામે ચોંકાવનારી ઘટના પ્રકાસમાં આવી છે. જેમાં સરકારી શાળામાં બાળકોને અપાયેલ ભોજનમાં ગરોળી નીકળતા હડકંપ મચી જવા પામ્યો હતો. બાદમાં બાળકે દેકારો બોલાવતા શિક્ષકો દોડતા થયા હતા. બાદમાં આ અંગે જિલ્લા પ્રાથમિક અધિકારીને જાણ કરાતા સબંધિત વિભાગ સામે તપાસના આદેશ છૂટયા છે. જોકે આ ગંભીર બેદરકારીને લઈ વાલીઓમાં આક્રોશનો જ્વાળા ભભૂકયો છે.
ગરોળી નીકળતા સોપો પડી ગયો
નવસારીના નાયક ફાઉન્ડેશનની ગંભીર બેદરકારી સામે આવી છે. નાયક ફાઉન્ડેશન સરકારી પ્રાથમિક શાળાઓમાં બાળકોને ભોજન પહોંચાડે છે.જેમાં સ્વચ્છતા બાબતે ધ્યાન ન અપાતું હોવાના બોલતા પુરાવારૂપ ઘટનામાં સામે આવી છે. ગાંધી ફળિયાની સરકારી પ્રાથમિક શાળામાં બાળકો ભોજન માટે બેઠા હતા આ દરમિયાન બાળકોને ભોજન પીરસાયું હતું.જેમાં થાળીમાં ભાત ઉપર દાળ નાખતી વેળાએ ગરોળી નીકળતા સોપો પડી ગયો હતો. જે મામલે જાણ થતા સમય સૂચકતા વાપરી શાળાના સત્તાવાળાઓએ બાળકોને ભોજન ખાવા દીધુ ન હતું. જેને લઈને ગંભીર ઘટના બનતા અટકી હતી.
બાદમાં આ મામલે જિલ્લા પ્રાથમિક શિક્ષણ વિભાગને જાણ કરવામાં આવતા અધિકારીઓ પણ ચોંકી ઉઠ્યા હતા અને તપાસના આદેશ આપ્યા છે. મહત્વનું છે કે અગાઉ પણ ભોજનને લઈને અનેક સવાલો ઉભા થયા હતા. છતાં આવા કિસ્સા અટકવાનું નામ ન લેતા અનેક સવાલો ઉભા થયા છે.
સળગતા સવાલ
- નાના બાળકોના આરોગ્ય સાથે ચેડા કોણ કરે છે?
- બાળકોને ખરાબ ભોજન કેમ આપવામાં આવે છે?
- શું આ ભોજન ખાવા લાયક છે?
- આ ભોજન ખાવાથી બાળકોને કાંઈ થશે તો જવાબદાર કોણ?
- ભોજન બનાવનારા કર્મી વિરુદ્ધ કાર્યવાહી થશે?
