હાઈ બ્લડ પ્રેશરની બીમારીને સાયલેન્ટ કિલર પણ કહેવામાં આવે છે. જેમાં બ્લડ પ્રેશર 90 થી 140 સુધી પહોંચી જાય છે. દિવસમાં કેટલીકવાર બ્લડ પ્રેશર વધી જતુ હોય છે પરંતુ તે તુરંત ઓછુ પણ થઈ જતુ હોય છે. જો આ બ્લડ પ્રેશર સતત વધેલુ રહે તો સ્વાસ્થ્ય માટે હાનીકારક સાબિત થાય છે. જેમાં હાર્ટ ફેલ અને હાર્ટ અટેક થવાની શક્યતા વધી જાય છે. હાઈ બ્લડ પ્રેશરના દર્દીઓને પોતાની લાઈફસ્ટાઈલ પર ખૂબ ધ્યાન આપવું જોઈએ. કેટલાક કિસ્સામાં હાઈ બ્લડ પ્રેશરના દર્દીમાં તેના લક્ષણો પણ દેખાતા નથી. હાલના સમયમાં બ્લડ પ્રેશરની બીમારી વૃદ્ધો ઉપરાંત યુવાનોમાં પણ જોવા મળી રહી છે. આજે આપણે બ્લડ પ્રેશરના કારણો અને તેના ઉપાયો વિશે જાણીશું.
બ્લડ પ્રેશરની બિમારીને કેવી રીતે કાબુ કરવી ?
હેલ્ધી ડાયટ : જો તમે બ્લડ પ્રેશરને કંટ્રોલ કરવા માંગતા હોય તો તમારે તમારી ડાયટમાં સુધારો કરવો જરૂરી છે. તમારા ભોજનમાં મીંઠુ એટલે કે સોડિયમનું પ્રમાણ ઘટાડી પોટેશિયમની માત્રા વધારી દો. આ સાથે તમારે ચરબીવાળો ખોરાક પણ ઓછો કરી દેવો જોઈએ અને ફળો, શાકભાજી વધારે પ્રમાણમાં ખાવા જોઈએ.
વ્યાયામ કરો : હાઈપર ટેન્શન એટલે કે બ્લડ પ્રેશરના દર્દીઓએ નિયમિત વ્યાયામ કરવો જોઈએ. જેમાં વેઈટ લિફ્ટિંગ, એરોબિક, સ્પીડ વોકિંગ જેવી એક્સરસાઈઝ સામેલ છે. વ્યાયામથી BP કંન્ટ્રોલમાં રહે છે અને બીજી બીમારીથી પણ બચી શકાય છે.
સ્ટ્રેસ ઘટાડો : પહેલા સ્ટ્રેસની સમસ્યા મોટી ઉંમરના લોકોમાં જ જોવા મળતી પરંતુ હવે યુવાનોમાં પણ સ્ટ્રેસની સમસ્યા જોવા મળે છે, જેથી તેના કારણે બ્લડ પ્રેશર વધારતા હોર્મોન્સ વધે છે. જેનાથી રક્ત વાહીકાઓ પર દબાણ વધે છે અને બ્લડ પ્રેશર વધે છે. જેથી બ્લડ પ્રેશરના દર્દીએ સ્ટ્રેસથી દૂર રહેવુ.
ધુમ્રપાન ન કરવું : જો તમે સિગારેટ કે કોઈ અન્ય ધુમ્રપાન કરો છો તમારૂ બ્લડ પ્રેશર વધે છે. તમાકુંમાં રહેલું નિકોટિન તમારી રક્ત કોશિકાઓને સંકુચિત કરી નાખે છે જેનાથી બ્લડ પ્રેશર વધવા લાગે છે.
વજન કંટ્રોલ કરવો : વધારે વજનથી બ્લડ પ્રેશરની બીમારીની શક્યતા વધી જાય છે. જેથી લોકોએ વજન મેન્ટેન કરવું જોઈએ, નહીં તો બ્લડ પ્રેશરની સાથે ડાયાબિટીસ થવાની શક્યતા રહે છે.
આ લોકોને થઈ શકે છે હાઈપર ટેન્શન
હવે વધતી ઉંમરવાળા લોકોને જ નહીં પરંતુ નાની ઉંમરમાં પણ બ્લડ પ્રેશરની સમસ્યા વધવા લાગી છે. જે લોકોનું વજન વધારે હોય છે તેમને હાઈ બ્લડ પ્રેશર થવાની શક્યતા વધી જાય છે.
લાઈફસ્ટાઈલ ખરાબ હોવાના કારણે હાઈ બ્લડ પ્રેશરની સમસ્યા થાય છે. જેમાં વધુ પડતું સોડિયમ એટલે કે મીંઠુ ખાવું, પોટેશિયમની ઉણપ સામેલ છે. આ સિવાય કસરત ન કરવી પણ બ્લડ પ્રેશરની સમસ્યા માટે જવાબદાર છે.
જો પરિવારમાં કોઈને બ્લડ પ્રેશરની બીમારી રહી હોય તો અન્ય લોકોને પણ તે બીમારી થવાની શક્યતા રહે છે. આ સિવાય મહિલાઓને 55 વર્ષની ઉંમર બાદ અને પુરૂષોમાં 55 પહેલા પણ હાઈપરટેન્શનની શક્યતા રહે છે.
