નિર્ણય / હવેથી ટિકિટ વિના ઓખા-બેટ દ્વારકા ફેરી બોટમાં એન્ટ્રી નહીં મળે, જાણો શું રહેશે દર

• ફેરી બોટ માટે ટિકિટ ફરજિયાત
• અગાઉથી ટિકિટ લેવી પડશે
• ટિકિટ હશે તો જ બોટમાં પ્રવેશ મળશે

ઓખા-બેટ દ્વારકા વચ્ચે ચાલતી ફેરી બોટ સેવા છાશવારે ચર્ચામાં આવતી હોય છે. મુસાફરો પાસેથી રૂપિયા ઉઘરાવા ઉપરાંત નીતિ-નિયમને નેવે મૂકી પેસેન્જર ભરવા બાબતે અનેક વખત સવાલો ઉઠ્યા હતા, ત્યારે આ મામલે તંત્ર દ્વારા હવે આકરો નિર્ણય કરવામાં આવ્યો છે. આ અંગેનો એક વીડિયો અગાઉ વાયરલ થયો હતો, જેમાં પેસેન્જર પાસેથી વધુ પૈસા ઉપરાંત ક્ષમતા કરતા વધુ પેસેન્જર બેસાડાયા હતા. ત્યારે આ વાયરલ વીડિયો બાદ તંત્ર સફાળું જાગ્યું છે અને ફેરી બોટને લઈને મહત્વનો નિર્ણય લેવામાં આવ્યો છે. 

અગાઉથી ટિકિટ લીધી હશે તો જ એન્ટ્રી અપાશે 
હવે ફેરી બોટ માટે ટિકિટ ફરજિયાત કરવામાં આવી છે. અગાઉથી ટિકિટ લીધી હશે તો જ બોટમાં પ્રવેશ મળશે. બોટમાં બેસીને રોકડમાં ભાડું આપી શકાશે નહીં. બોટના ચાલકો મોટી સંખ્યામાં મુસાફરો ભરતા હોવાથી આ નિર્ણય લેવામાં આવ્યો છે. વયસ્કો માટે એક તરફની ટિકિટના 20 રૂપિયા અને બાળકો માટે એક તરફની ટિકિટના 10 રૂપિયા નક્કી કરાયા છે. આ ભાવ આજથી અમલમાં આવી ગયા છે. 

ટિકિટના ભાવ કરાયા નક્કી
થોડા સમય પહેલા જ ફેરી બોટમાં ક્ષમતા કરતાં વધુ પેસેન્જર ભરવામાં આવતા હોવાની અને વધુ નાણા ખંખેરી લેવામાં આવતા હોવાની અનેક ફરિયાદો ઉઠવા પામી હતી. જે બાદ હવે ફેરી બોટમાં પ્રવાસીઓ માટે  ટિકિટ ફરજિયાત કરવામાં આવી છે. પેસેન્જરોએ અગાઉથી ટિકિટ લેવી પડશે. ટિકિટ વગર પેસેન્જરને બોટમાં બેસાડવામાં આવશે નહીં અને કેપેસિટી જેટલા જ મુસાફરો બેસાડવા પડશે. આ સિવાય પુખ્તવયના લોકો માટે 20 અને બાળકોના 10 રૂપિયા ટિકિટ દર નક્કી કરવામાં આવ્યો છે. તેનાથી વધુ નાણા ઉઘરાવી શકાશે નહીં.

ફેરી બોટના વીડિયો થયા હતા વાયરલ 
અત્રે ઉલ્લેખનીય છે કે, થોડા દિવસ પહેલા ઓખા-બેટ દ્વારકા પેસેન્જર જેટી તેમજ ફેરી બોટના વીડિયો વાયરલ થયા હતા. ફેરી બોટ સર્વિસમાં ક્ષમતા કરતા વધુ પેસેન્જર ભરાયા હોવાનું વીડિયોમાં જોવા મળ્યું હતું.  આ સાથે ફેરીબોટમાં પેસેન્જર લાઇફ જેકેટ વગર જોવા મળ્યા હતા. પેસેન્જર જેટીના પુલના પગથિયાં પર મોટી સંખ્યામાં લોકોની ભીડ જોવા મળી હતી. આવામાં જો કોઈ દુર્ઘટના થાય તો તેના જવાબદાર કોણ તેને લઈને પણ સવાલ ઊભા થયા હતા. ઓખા-બેટ દ્વારકા પેસેન્જર જેટી તેમજ ફેરી બોટનો વીડિયો વાયરલ થયા બાદ તંત્ર સામે અનેક સવાલો ઊભા થયા હતા. VTV ન્યૂઝ દ્વારા પણ આ અંગેનો અહેવાલ પ્રકાશિત કરાયો હતો.