- હાર્દિક પંડ્યાની એડી અને ઘૂંટણની ઈજા વકરી
- આઈપીએલમાં આરામ અપાય તેવી શક્યતા
- મુંબઈ ઈન્ડીયન્સનો છે કેપ્ટન
- રોહિત શર્માને ફરી મળી શકે તક
મુંબઈ ઈન્ડીયન્સના કેપ્ટન હાર્દિક પંડ્યાની એડી અને ઘૂંટણની ઈજા વકરી હોવાથી તેને આઈપીએલમાં આરામ અપાય તેવી શક્યતા છે. તેની ઈજા ઘણી ગંભીર છે અને તે રમી શકે તેવી હાલતમાં નથી તેવું સૂત્રોએ ભારપૂર્વક જણાવ્યું છે. ટીમ ઈન્ડિયાના ઓલરાઉન્ડર હાર્દિક પંડ્યાને વર્લ્ડ કપ 2023ની શરૂઆતની મેચો દરમિયાન ઈજા થઈ હતી, જે બાદ તે ક્રિકેટના મેદાનથી દૂર રહ્યો છે. હાર્દિક પંડયા વર્લ્ડ કપ 2023 અને ત્યાર બાદ સાઉથ આફ્રિકાના પ્રવાસ બાદ ઓસ્ટ્રેલિયા સામેની પાંચ મેચોની ઘરઆંગણાની ટી-20 ઈન્ટરનેશનલ શ્રેણીમાંથી બહાર થઈ ગયો છે, પણ હવે તેની ફિટનેસને લઈને મોટું અપડેટ સામે આવ્યું છે. હાર્દિક પંડ્યા 2024ની આઈપીએલ અને અફઘાનિસ્તાન સામેની ટી-20 આંતરરાષ્ટ્રીય શ્રેણીમાંથી પણ બહાર થઈ શકે છે.
કેવી છે હાર્દિકની ઈજા
હાર્દિક પંડ્યાની એડી અને ઘૂંટણમાં ગંભીર ઈજા છે અને હજુ તેને જેટલું જોઈએ તેટલું સારુ થયું નથી. રિપોર્ટ મુજબ હાર્દિક પંડ્યા હાલ તેની એડીની ઈજામાંથી બહાર આવી રહ્યો નથી. હાર્દિક પંડ્યા આઈપીએલ 2024 માટે મુંબઈ ઈન્ડિયન્સ પરત ફર્યો હતો અને તેને રોહિત શર્માની જગ્યાએ કેપ્ટન બનાવવામાં આવ્યો છે. હવે આ બધામાં હાર્દિકનો ફિટનેસ રિપોર્ટ ટીમ ઈન્ડિયાની સાથે સાથે મુંબઈ ઈન્ડિયન્સ માટે પણ કોઈ મોટા આંચકાથી ઓછો નથી.
આઈપીએલ અને અફઘાનિસ્તાન શ્રેણીમાંથી હાર્દિકને આરામ મળી શકે
અફઘાનિસ્તાન સામેની ટી-20 શ્રેણીમાંથી જ નહી પણ આઇપીએલ 2024થી પણ પંડ્યાને બહાર બેસવું પડી શકે છે. રોહિત શર્મા અફઘાનિસ્તાન સામેની ટી-20 ઈન્ટરનેશનલ ટીમમાં પુનરાગમન કરશે કે નહિ તે અંગે પણ સસ્પેન્સ છે. હાર્દિક પંડ્યા 2022, 2023 માં આઈપીએલમાં ગુજરાત ટાઇટન્સ તરફથી રમ્યો હતો, પરંતુ આ સિઝન માટે, તેને મુંબઈ ઈન્ડિયન્સ દ્વારા ઓલ-કેશ ડીલ સાથે ગુજરાત ટાઇટન્સ સાથે વેપાર કરવામાં આવ્યો છે.
