આદેશ / ગુજરાત હાઇકોર્ટે ઉધડો લેતા રખડતા ઢોર મામલે ગાઇડલાઇનનો ચુસ્ત અમલ કરવા શહેરી તંત્રોને તાકીદ, કહ્યું 'રોજેરોજની માહિતી અપલોડ કરતા રહો'

• ગુજરાતમાં રખડતાં ઢોરની સમસ્યાને લઈ મોટા સમાચાર
• હાઇકોર્ટની ફટકાર બાદ હવે તંત્ર એક્શન મોડમાં આવ્યું
• શહેરી વિકાસ વિભાગના અગ્ર સચિવ એક્શન મોડમાં 
• તમામ ઉચ્ચ અધિકારીઓ સાથે બેઠક યોજી આપ્યો આ આદેશ 

Stray Cattle In Gujarat : ગુજરાતમાં રખડતાં ઢોરની સમસ્યાને લઈ એક મોટા સમાચાર સામે આવ્યા છે. અગાઉ હાઇકોર્ટની ફટકાર બાદ હવે તંત્ર એક્શન મોડમાં આવ્યું છે. વાત જાણે એમ છે કે, તાજેતરમાં જ અમદાવાદમાં રખડતાં ઢોરની સમસ્યા અંગે ગુજરાત હાઈકોર્ટે શહેરી વિકાસ વિભાગ, અમદાવાદ મ્યુનિસિપલ કમિશ્નર અને અમદાવાદના ટ્રાફિક એડિશનલ પોલીસ કમિશ્નરનો ઉધડો લીધો હતો. જે બાદમાં હવે તંત્ર હરકતમાં આવ્યું હોવાનું સામે આવ્યું છે. 

શહેરી વિકાસ વિભાગના અગ્ર સચિવ એક્શન મોડમાં 
હાઇકોર્ટની ફટકાર બાદ હવે શહેરી વિકાસ વિભાગના અગ્ર સચિવ અશ્વિનીકુમારે મ્યુનિસિપલ એડમિનિસ્ટ્રેશનના કમિશ્નર રાજકુમાર બેનીવાલને સાથે રાખી તમામ આઠ મ્યુનિસિપલ કમિશ્નરો, રિજનલ મ્યુનિસિપલ કમિશ્નરો તેમજ તમામ 157 નગરપાલિકાના ચીફ ઓફિસરો જોડે તાકીદની વીડિયો કોન્ફરન્સ યોજી બધાને રખડતાં ઢોરોના નિયંત્રણ માટે અગાઉ ઘડાયેલી ગાઈડલાઈનનો ચુસ્ત અમલ કરવા માટે કડક સૂચના આપી હતી.

જાણો શું-શું સૂચના આપી 
શહેરી વિકાસ વિભાગના અગ્ર સચિવ અશ્વિનીકુમારે તમામ સંબંધિત અધિકારીઓને રખડતાં ઢોરને પકડી તેને ડબ્બામાં પૂરવા, તેના માલિકને અવારનવારના ગુના માટે નક્કી થયેલી રકમ પ્રમાણે દંડવા, ઢોરને ટેગિંગ કરવા વગેરે માટે અગાઉ ઘડાયેલ ગાઈડલાઈનનો ગંભીરતાથી અમલ કરવા તેમજ રોજેરોજની માહિતી ફોટોગ્રાફ સાથે વેબસાઈટ ઉપર અપલોડ કરવા તથા આ તમામ કાર્યવાહીનું મોનિટરિંગ કરવા બેઠકમાં સૂચના આપી છે. 

તમામ ઉચ્ચ અધિકારીઓને કડક સૂચના 
મહત્વનું છે કે, રખડતાં ઢોરની સમસ્યાને લઈ તમામ મ્યુનિસિપલ કમિશ્નરો, તમામ ચીફ ઓફિસરો, તમામ જિલ્લા કલેક્ટરો તથા જિલ્લા પોલીસવડાઓને પત્ર દ્વારા પણ જાણ કરવામાં આવી છે. નોંધનીય છે કે, તા.27મી ઓક્ટોબરે હાઇકોર્ટમાં યોજાયેલી સુનાવણી બાદ સમગ્ર બાબતનો એક અઠવાડિયામાં રિપોર્ટ માગવામાં આવ્યો હોઈ શહેરી વિકાસ વિભાગે રખડતાં ઢોરોના ત્રાસથી નાગરિકોને બચાવવા સંનિષ્ઠ પ્રયાસો કરવા જણાવ્યું હતું. રાજ્યમાં રખડતાં ઢોરની વકરેલી સમસ્યા અંગે દૈનિક રિપોર્ટ તૈયાર કરવાનું પણ બેઠકમાં નક્કી થયું હતું.