સફળતા / ગુજરાતીઓ વાંચી લે આ સમાચાર, વડોદરાની ઘટના તમને ધ્રુજાવી દેશે, પોલીસે કર્યો આ કૌભાંડનો પર્દાફાશ

• વડોદરામાં ઇન્ટર સ્ટેટ ચાઈલ્ડ ટ્રાફિકિંગ કૌભાંડનો પર્દાફાશ
• બાળકનો લાખમાં સોદો કરનાર દિલ્લીની મહિલાની વડોદરાથી ધરપકડ
• બાળક ખરીદવા આવેલી દંપતી રેલ્વે સ્ટેશનથી ઝબ્બે

વડોદરામાંથી ઇન્ટર સ્ટેટ ચાઈલ્ડ ટ્રાફિકિંગ કૌભાંડનો પર્દાફાશ થયો છે. જેમાં આઠ દિવસની ફૂલ જેવી માસૂમ બાળકીનો અઢી લાખમાં સોદો થયો હોવાનું ઉઘાડું પડયું છે. આ મામલે પોલીસે બાતમીને આધારે બે મહિલા સહીત ચાર શખ્સોને દબોચી લઇ કાયદેસરની કાર્યવાહી હાથ ધરી છે.

DCP એ LCBની ટીમને એક્ટિવ કરી વોચ ગોઠવી ઓપરેશન પાર પાડ્યું
વડોદરા પોલીસને ચાઈલ્ડ ટ્રાફિકિંગ કૌભાંડ ઝડપી લેવામાં મોટી સફળતા હાથ લાગી છે. જેમાં ઈન્ટરનેટના માધ્યમથી વડોદરાની મહિલાએ બાળકીનો સોદો  કર્યો હતો. ત્યારબાદ વાતચીત થયા મુજબ દિલ્હીથી બાળકીને વડોદરાના સલાટવાળા ખાતે વેચવા માટે લાવવામાં આવી હતી. આ અંગે એક મહિલાએ DCP અભય સોનીને બાતમી આપી હતી. જે બાબતની ગંભીરતાને લઈને પોલીસ દ્વારા DCP એ LCBની ટીમને એક્ટિવ કરી વોચ ગોઠવી દેવામાં આવી હતી. બાળકનો લાખમાં સોદો કરનાર દિલ્લીની મહિલાની અને બાળક ખરીદવા આવેલી મહિલાને પોલીસે રેલ્વે સ્ટેશનથી દબોચી લઇ સમગ્ર ઓપરેશન પાર પાડ્યું હતું. ત્યારબાદ કથિત રીતે દિલ્હીથી વડોદરા લાવેલી માત્ર આઠ દિવસની ઉમરની બાળકીને પ્રાથમિક સારવાર માટે વડોદરાની સયાજી હોસ્પિટલમાં મોકલી આપવામાં આવી છે. 

દુરંતો એક્સપ્રેસમાંથી બાળક સાથે મહિલાને ઝડપી લેવાઇ
પોલીસે દુરંતો એક્સપ્રેસમાંથી બાળક સાથે મહિલા અને તેના પતીની ધરપકડ કરી હતી. જેની  પૂછપરછમાં ઈન્ટરનેટના માધ્યમથી બાળકીને વેંચનાર અને ખરીદનાર બંને પરિચયમાં આવ્યા હતા અને ઈન્ટરનેટ પરથી જ સોદો થયો હોવાનું સામે આવ્યું છે. હાલ આ સમગ્ર પ્રકરણમાં પોલીસે સૌરભ વિશ્વનાથ વેરા અને તેની પત્ની સોમા વેરા (રહે. તુલસીદાસની ચાલી, સલાટવાડા, કારેલીબાગ) પૂજા અને દિપક કુમારની ધરપકડ કરી અને કેટલા સમયથી આ ઇન્ટર સ્ટેટ ચાઈલ્ડ ટ્રાફિકિંગ કૌભાંડમાં સંડોવાયેલ છે તથા અન્ય કેટલા બાળકોને આ પ્રકારે વેચવામાં આવ્યા તે સહીતની દિશામાં પોલીસે તપાસ આગળ ધપાવી છે.