દૂર્ઘટના / અમદાવાદની શ્રેય હોસ્પિટલમાં અગ્નિકાંડની આ તસવીરો જોઈ આંખો ભીની થઈ જશે

• દૂર્ઘટનાની તસવીરો જોઈ રડી ઉઠશો
• આ ઘટનાથી તંત્રની બેદરકારી પણ સામે આવી
• કેમ વારંવાર ઘટે છે આવી ઘટનાઓ?

ઘટના છે અમદાવાદના શ્રેય હોસ્પિટલની. જ્યાં પરિવારજનોનો જમાવડો થયો છે.. કારણ કે જે હોસ્પિટલમાં લોકોએ પોતાના પરિવારજનોને કોરોનાની સારવાર માટે દાખલ કર્યા હતા. મધ રાત્રે એટલે કે 3થી 4 વાગ્યાની આસપાસ અચાનક આગ લાગી હતી.  શ્રેય હોસ્પિટલના ચોથા માળે કોરોનાના દર્દીઓ ICU વોર્ડમાં દાખલ હતા. અચાનક આગ લાગી.. અને આ આગમાં એક સાથે 8 જિંદગી ભૂંજાઈ ગઈ.

મળતી વિગતો મુજબ 3 મહિલા અને 5 પુરુષના આગ લાગવાના કારણે મૃત્યુ થયા છે.

કેટલાક દાઝ્યા છે તો કેટલાકનો શ્વાસ રૂંધાવાના કારણે જીવ ગયો છે.. હદ તો ત્યારે થાય જ્યારે માનવતા મરી પરવારે. જે દર્દીઓના મૃત્યુ થયા એ તમામ દર્દીના પરિવારજનોને હોસ્પિટલમાં આગ લાગ્યા અંગે કોઈ જાણકારી જ ન અપાઈ. 

જ્યારે મીડિયામાં આ સમાચાર વહેતા થયા ત્યારે પરિવારજનોને જાણ થઈ અને બાદમાં હોસ્પિટલ બહાર પરિવારજનોનો જમાવડો થઈ ગયો. લોકોમાં આક્રોશ હતો. આંખોમાં આંસુ હતા અને તંત્ર અને હોસ્પિટલ વિરુદ્ધ રોષ પણ હતો. પરિવારજનોને તેમના સંબંધીઓનો એકવાર ચહેરો જોવો હતો. પણ તેના માટે પણ તંત્રએ મંજૂરી ન આપી.

શ્રેય 50 બેડવાળી કોવિડ-19 હોસ્પિટલ છે. જ્યાં 40થી વધુ કોરોનાના દર્દીઓ સારવાર લઈ રહ્યા હતા. દુર્ઘટનામાં જે દર્દીઓના મોત થયા છે તેમના મૃતદેહોને પીએમ માટે લઈ જવામા આવ્યા છે. જ્યારે અન્ય દર્દીઓને SVP હોસ્પિટલમાં ખસેડાયા છે.