વલસાડ / DJ સાથે વાજતે-ગાજતે ગણપતિ બાપ્પાની મૂર્તિ લઈ જતાં હતા ભક્તો, પોલીસે કર્યું એવું કામ કે ધારાસભ્ય સાથે થઈ બબાલ

• વલસાડમાં પોલીસ અને ધારાસભ્ય વચ્ચે બોલાચાલી
• ગણપતિની મૂર્તિ લઈ જતા ડીજેને બંધ કરાવતા વિવાદ
• મામલો ગરમાતા MLA ભરત પટેલ ઘટનાસ્થળે પહોંચ્યા

હવે ગણેશચતુર્થી નજીક આવી રહી છે ત્યારે સૌ કોઇ ભગવાન ગણેશજીની મૂર્તિ વાજતે-ગાજતે પોતાના ઘરે લઇ જશે. ત્યારે વલસાડના તિથલ રોડ પર ભક્તો વાજતે-ગાજતે ગણપતિની મૂર્તિ લઇ જતા હતા. એ દરમ્યાન પોલીસે ડીજે બંધ કરાવવા જતા વિવાદ સર્જાયો હતો.

મામલો બીચકતા ઉચ્ચ પોલીસ અધિકારીઓનો કાફલો પહોંચ્યો ઘટનાસ્થળે

પોલીસે જે-તે ઘટનાસ્થળેથી લેપટોપ સહિતની સામગ્રી લઇ લેતા બબાલ થઇ હતી. જો કે, મામલો વધારે ઉગ્ર બનતા ધારાસભ્ય ભરત પટેલ ઘટનાસ્થળે પહોંચ્યા હતા. આથી, આ સમગ્ર મામલે ધારાસભ્ય અને પોલીસ વચ્ચે ઉગ્ર બોલાચાલી થઇ હતી. જો કે, મામલો વધારે બીચકતા ઉચ્ચ પોલીસ અધિકારીઓએ ઘટનાસ્થળે જઇને સમગ્ર મામલો થાળે પાડ્યો હતો.

પોલીસના અધિકારીઓએ ફોન ન ઉપાડતા ખુદ MLA ઘટનાસ્થળે પહોંચ્યા

તિથલ રોડ પરથી જ્યારે ગણેશભક્તો વાજતે-ગાજતે ભગવાન ગણેશજીની મૂર્તિ લઇને જઇ રહ્યાં હતા એ દરમ્યાન પોલીસના ડી-સ્ટાફ વિભાગના માણસોએ તેઓના રોક્યા હતા. તેઓનું લેપટોપ પણ જપ્ત કરી લીધું હતું તેમજ ડીજે પણ બંધ કરાવી દીધું હતું. આથી, આ ભક્તોએ વલસાડના ધારાસભ્યને ફોન કર્યો હતો પરંતુ પોલીસના અધિકારીઓએ તેઓનો ફોન ન ઉપાડતા ખુદ ધારાસભ્ય ભરત પટેલ ઘટનાસ્થળે આવી પહોંચ્યા હતા. આથી, પોલીસ અને ધારાસભ્ય વચ્ચે ઉગ્ર બોલાચાલી થઇ હતી. જેથી બાદમાં આ બોલાચાલીની જાણ થતા ઉચ્ચ અધિકારીઓનો કાફલો પણ ઘટનાસ્થળે દોડી આવ્યો હતો ને બાદમાં સમગ્ર મામલો થાળે પાડ્યો હતો.