- અમરેલીમાં બગસરાના સમઢિયાળામાં શ્વાનોનો આંતક
- સમઢિયાળા ખાતે ત્રણ દિવસમાં 5 બાળકોને બચકા ભર્યા
- શ્વાનોના આતંકથી સમઢિયાળા ગામમાં ભયનું વાતાવરણ
રાજ્યમાં રખડતા આખલા બાદ હવે શ્વાનનો ત્રાસ ચિંતાજનક હદે વધી ગયો છે. રસ્તે રખડતા શ્વાન પહેલા રાહદારીઓ કે ટુ-વ્હીલર ચાલકોની પાછળ દોડીને પરેશાન કરતા હતા, પરંતુ હવે તો ઘરના આંગણે રમતા બાળકો પણ શ્વાનના ત્રાસનો ભોગ બની રહ્યાં છે. ગુજરાતમાં શ્વાનનો આતંક અટકવાનું નામ નથી લઈ રહ્યો. દરરોજ એક યા બીજા શહેરમાંથી શ્વાનના હુમલાના સમાચાર સામે આવતા રહે છે. અમરેલીના બગસરાના સમઢિયાળામાં શ્વાનોનો આતંક વધ્યો છે. સમઢિયાળા ખાતે ત્રણ દિવસમાં 5 બાળકોને શ્વાને બચકા ભર્યા છે.
5 બાળકોને રખડતા શ્વાને બચકા ભર્યા
શ્વાનો દ્વારા એકલા નીકળતા બાળકો પર હુમલાઓ વધ્યા છે. સ્કૂલે જતા બાળકોને શ્વાનો નિશાન બનાવે છે. છેલ્લા ત્રણ દિવસમાં રખડતા શ્વાનોએ 5 બાળકો પર હુમલો કર્યા છે. જેમાંથી ત્રણ બાળકોને અમરેલી ખાતે અને એક બાળકને રાજકોટમાં સારવાર અર્થે ખસેડવામાં આવ્યો છે. શ્વાનોના આતંકથી સમઢિયાળા ગામમાં ભયનું વાતાવરણ જોવા મળી રહ્યું છે. સ્થાનિકો જલ્દી રખડતા શ્વાનને પકડવામાં આવે તેવી માગ કરી રહ્યાં છે.
મહિલાને ત્રણ કુતરાઓએ બચકા ભર્યા
ગત 27 માર્ચે સુરેન્દ્રનગરમાં એક મહિલા પર શ્વાનોના ટોળાએ હુમલો કર્યો હતો. શહેરના ભરતપરા વિસ્તારમાં રહેતી મહિલાને ત્રણ કૂતરાઓએ પકડી અને બંને પગે ઇજાઓ પહોંચાડી હતી. તેમને તાત્કાલિક હોસ્પિટલ ખાતે ખસેડવામાં આવ્યા હતા. મહિલાને બંને પગે ટાંકા લેવા પડ્યા હતા.
શ્વાને 25 જેટલા બચકા ભરતા બાળકનું થયું હતું મૃત્યુ
આ પહેલા સુરતમાંથી પણ હાથના રુંવાડા ઉભા કરી નાખે એવો બનાવ સામે આવ્યો હતો. શહેરના ભેસ્તાન વિસ્તારમાં ઘરના આંગણે રમી રહેલા 6 વર્ષના બાળકને શ્વાને 25 બચકાં ભર્યા કર્યા હતા. ઈજાગ્રસ્ત બાળકને સારવાર માટે તાત્કાલિક હોસ્પિટલમાં ખસેડાયો હતો. જ્યાં બાળકનું ટૂંકી સારવાર દરમ્યાન મોત થયું હતું.
