- ડાકોર મંદિરમાં VIP દર્શનનો મામલો
- VIP દર્શનને લઈ આવનારા દિવસોમાં વિવાદ વકરવાની સંભાવના
- ડાકોર મંદિરમાં VIP દર્શન બંધ નહિ કરવામાં આવે તો મંગળવારે આંદોલનની ચીમકી
ખેડા ખાતે ડાકોરના ઠાકોર કરોડો લોકોની આસ્થાના અખૂટ સાગર સમાન છે. જે ડાકોર મંદિરમાં પૈસા આપી VIP દર્શન કરાવવામાં આવતું હોવાનો મુદ્દે ફરી ઘમાસાણ સર્જાયું છે. હવે ડાકોર મંદિરમાં VIP દર્શન બંધ કરાવવાની માંગ સાથે આંદોલનની ચિમકી ઉચ્ચારવામાં આવી છે. ધર્મના નામે ધંધા સમાના આ પ્રથા અંગે સોશિયલ મીડિયામાં મુદ્દો ગરમાયો છે અને ભક્તોમાં ભારોભાર રોષની લાગણી જોવા મળી રહી છે. ટ્રસ્ટીઓ પૈસાદાર-ગરીબોમાં તફાવત રાખતા હોવાના આકરા આરોપસર VIP દર્શન જો બંધ કરવામાં નહિ આવે તો મંગળવારે ઉગ્ર આંદોલન કરવામાં આવશે તેવી ચિમકી ઉચ્ચારવામાં આવી છે.
બની બેઠેલા ટ્રસ્ટીઓ ભક્તો સાથે અમીર અને ગરીબનો તફાવત રાખતા હોવાનો આક્ષેપ
ડાકોર મંદિરમાં VIP દર્શનને લઈને જો નમતું જોખવામા નહિ આવે તો VIP દર્શનને લઈ આવનારા દિવસોમાં વિવાદ વકરવાની સંભાવના જોવા મળી રહી છે. ડાકોર મંદિરમાં પણ અંબાજીની જેમ VIP દર્શન બંધ કરવાની રજુઆત સાથે આંદોલનકારીઓએ ચીમકી ઉચ્ચારી છે.
શુ છે સમગ્ર મામલો?
અગાઉ ડાકોરમાં મંદિરની કમિટી દ્વારા વિવાદિત નિર્ણય લેવાયો હતો. જેમાં હવે ભક્તોએ રણછોડ રાયના નજીકથી દર્શન માટે રૂ.500 ચૂકવવા પડશે. આ સાથે મહિલાઓની લાઈનમાં પુરૂષે જઈ દર્શન કરવા હોય તો 250 રૂપિયા ચાર્જ વસૂલાશે. આ નિર્ણયને લઈને વિવાદના બીજ રોપાયા છે. મહિલાઓ માટેની દર્શનની જાળીએથી પુરુષે દર્શન કરવા હોય તો 250 રૂપિયા ન્યોછાવર પેટે ચાર્જ વસુલાશે. જેને લઈને ભક્તોમાં રોષ જોવા મળી રહ્યો છે. VIP દર્શનની વ્યવસ્થા પાછી ખેંચવાની માગણી સાથે ઉપવાસ આંદોલન પર ઉતરવાની ચીમકી પણ ઉચ્ચારવામાં આવી છે.
