- અમદાવાદમાં લાંબા સમયનાં વિરામ બાદ મેઘરાજાની એન્ટ્રી
- જજીસ બંગ્લોઝ, વસ્ત્રાપુર સહિતનાં વિસ્તારમાં વરસાદી ઝાપટું પડ્યું
- વરસાદી ઝાપટું પડતાની સાથે જ માર્ગો પર ઠેર ઠેર ટ્રાફિક જામ
અમદાવાદમાં લાંબા સમયનાં વિરામ બાદ અચાનક શનિવારે સાંજે વરસાદી વાતાવરણ છવાયું હતું. અમદાવાદનાં જજીસ બંગ્લોઝ, વસ્ત્રાપુર સહિતનાં વિસ્તારમાં વરસાદી ઝાપટું પડ્યું હતું. વરસાદનાં કારણે વાતાવરણમાં ઠંડક થવા પામી હતી. તો બીજી તરફ રસ્તા પર શનિવારે લોકો પરિવાર સાથે બહાર નીકળ્યા હોઈ વરસાદે તેઓની પાર્ટીની મઝા બગાડી હતી. તો વરસાદી ઝાપટું પડતાની સાથે જ માર્ગો પર ઠેર ઠેર ટ્રાફિક જામનાં દ્રશ્યો સર્જાયા હતા. અમદાવાદનાં નરોડા, સેટેલાઈટ તેમજ એસ.જી. હાઈવે વિસ્તારમાં જોરદાર વરસાદી પડતા બ્રિજ પર વાહન ચાલકોની ભારે લાઈનો લાગી હતી.
વરસાદ ખેંચાતા ખેડૂતો મુશ્કેલીમાં મુકાયા
રાજ્યમાં વરસાદ ખેંચાવાના કારણે રાજ્યના ખેડૂતો મુશ્કેલીમાં મુકાયા છે. મહેસાણા જિલ્લામાં છેલ્લા 20 દિવસથી વરસાદ ન વરસતા ખેડૂતો પાક સુકાઈ જવાની ભીતિ સેવી રહ્યા છે. તો બીજી તરફ અરવલ્લી જિલ્લામાં વરસાદ ખેંચાતા ખરીફ પાક ઉપર ખતરો તોળાઈ રહ્યો છે. બીજી તરફ ગીર સોમનાથમાં પાણીની અછત સર્જાતા ખેડૂતો પાકને પિયત કરવા મજબૂર બન્યા છે.
વરસાદને અંગે અંબાલાલ પટેલની આગાહી
હવામાન નિષ્ણાંત અંબાલાલ પટેલે જણાવ્યું કે, 27થી 30 ઓગસ્ટ દરમિયાન દક્ષિણ ગુજરાત, દક્ષિણ સૌરાષ્ટ્રમાં હળવા ઝાપટાં પડશે. પિયત વ્યવસ્થાપન હોય તો ખેડૂતોએ પીયત કરવું જોઈએ. ગરમીની આગાહી કરતા તેઓએ જણાવ્યું છે કે, 28 ઓગસ્ટથી દેશમાં ગરમી વધવાની શક્યતા છે.
