ડૉ.બાબાસાહેબ આંબેડકર ઓપન યુનિવર્સિટીનો 'સેનેટરી ઈન્સ્પેક્ટર'નો કોર્સ ગેરકાયદેસર હોવાના આક્ષેપ મુદ્દે યુનિવર્સિટીના ઈન્ચાર્જ રજિસ્ટ્રારે કહ્યું કે અમારો કોર્સ માન્ય જ છે. આ કોર્સ માટે UGCની માન્યતા લેવાની જરૂર નથી.
અમદાવાદની ડૉ. બાબાસાહેબ આંબેડકર ઓપન યુનિવર્સિટીમાં ચાલતો 'ડિપ્લોમા કોર્સ ઇન હેલ્થ સેનિટરી ઇન્સ્પેક્ટર'નો કોર્સ અમાન્ય હોવાનો આરોપ લાગ્યા બાદ યુનિવર્સિટીના ઈન્ચાર્જ રજિસ્ટ્રારનું નિવેદન સામે આવ્યું છે. તેમણે યુનિવર્સિટી પર લાગેલા તમામ આરોપોને ફગાવી દીધા છે.
ગુજરાત પંચાયત સેવા પસંદગી મંડળે પત્ર મોકલ્યો હતોઃ રજિસ્ટ્રાર
યુનિવર્સિટીના ઈન્ચાર્જ રજિસ્ટ્રાર ભાવિન ત્રિવેદીએ જણાવ્યું છે કે, ગુજરાત પંચાયત સેવા પંસદગી મંડળ દ્વારા અમને 2 ફેબ્રુઆરીના રોજ પત્ર મોકલવામાં આવ્યો હતો. જેનો જવાબ અમે તારીખ 4 ફેબ્રુઆરીના રોજ આપ્યો હતો. પત્રમાં અમે સ્પષ્ટ જણાવ્યું છે કે આ પેરામેડિકલ કોર્સ નથી અને અમે ડિપ્લોમાં અભ્યાસક્રમ ચલાવીએ છીએ. જેમાં દરેક 12 પાસ વિદ્યાર્થીઓ એડમિશન લઈ શકે છે. લાયકાતના ધોરણ જોતા વિદ્યાર્થીઓ એલિજિબલ થઈ શકે છે.
પંચાયત સેવા મંડળને અમે સંપૂર્ણ માહિતી આપી હતીઃ રજિસ્ટ્રાર
તેમણે જણાવ્યું કે, પંચાયત સેવા પસંદગી મંડળમાંથી જે અધિકારીઓ આવ્યા હતા, જેઓને અમે અમારા અભ્યાસ ક્રમની વિગત, કોર્સની વિગત, સિલેબસ, પુસ્તકોની સંખ્યા અને લેવાતા પ્રેક્ટિકલની માહિતી આપી હતી. અમારી માહિતીથી આવેલા અધિકારી સંતુષ્ટ હતા.
'આ કોર્સ માટે UGCની માન્યતા લેવાની જરૂર નથી'
ભાવિન ત્રિવેદીએ જણાવ્યું છે કે, આ વાત એકદમ પાયા વિહોણી છે, ડિપ્લોમાં અને સર્ટિફિકેટ કોર્સ માટે અમારે UGCની માન્યતા લેવાની હોતી નથી. સર્ટિફિકેટ અને ડિપ્લોમાં કોર્સ એ વિદ્યાર્થીની લાયકાતમાં પિછું ઉમેરાતું હોય છે. તેમણે જણાવ્યું કે, ધારો કે CCCનો અભ્યાસક્રમ છે, તો CCCના અભ્યાસક્રમ પર કોઈને નોકરી મળશે એવું ક્યાંય નથી. તેમની લાયકાતના ધોરણો તો એજ હોય. પરંતુ CCCનો કોર્સ કર્યો હશે તો કોમ્પ્યુટરની જાણકારી પણ વિદ્યાર્થી પાસે છે એમ જાણીને એને બીજા વિદ્યાર્થીઓ કરતા વધારે લાયક ઠેરવવામાં આવે છે.
કોર્સ અમાન્ય હોવાનો આરોપ લગાવામાં આવ્યો
વાસ્તવમાં રાજકોટ મ્યુનિસિપલ કોર્પોરેશનની ભરતી પરીક્ષા દરમિયાન કોર્સ અમાન્ય હોવાનો આરોપ લગાવામાં આવ્યો હતો. ઉમેદવારો પરીક્ષા આપવા આવ્યા ત્યારે કોર્સ ગેરકાયદે હોવાનો આરોપ લગાવવામાં આવ્યો હતો. આ ઉમેદવારોએ ડૉ.બાબાસાહેબ આંબેડકર ઓપન યુનિવર્સિટીમાંથી કોર્સ કર્યો હતો. ગુજરાત પંચાયત સેવા પસંદગી બોર્ડે આ કોર્સ માન્ય ન હોવાનું લેખિતમાં જણાવ્યું હતું.
ગુજરાત પંચાયત સેવા પસંદગી મંડળે કરી હતી સ્પષ્ટતા
1 ફેબ્રુઆરીએ ગુજરાત પંચાયત સેવા પસંદગી મંડળ દ્વારા ડો.બાબાસાહેબ આંબેડકર ઓપન યુનિવર્સિટીના રજિસ્ટ્રારને પત્ર લખીને સ્પષ્ટતા કરી હતી કે, 'ડિપ્લોમા ઈન હેલ્થ સેનિટરી ઈન્સ્પેક્ટરનો કોર્સ ઉપરોક્ત ભરતી પ્રક્રિયા માટે માન્ય ગણાશે નહીં.'
7500થી વધુ વિદ્યાર્થીઓએ કર્યો છે આ કોર્સ
અત્રે ઉલ્લેખનીય છે કે, અમદાવાદની ડો. બાબાસાહેબ આંબેડકર ઓપન યુનિવર્સિટીમાં 'ડિપ્લોમા કોર્સ ઇન હેલ્થ સેનિટરી ઇન્સ્પેક્ટર' વર્ષ 2018થી શરૂ કરાયો છે. આ પાંચ વર્ષમાં અંદાજિત 7500થી વધુ વિદ્યાર્થીઓએ આ કોર્સ કર્યો છે.
